नेपालगञ्ज, १८ जेठ । नेपाली कांग्रेस, बाँके क्षेत्र नं. २ तथा प्रदेश क्षेत्र ‘क’ र ‘ख’ को तेस्रो क्षेत्रीय सम्मलेन यही जेठ २० मंगलवार बिहान १० बजे नेपालगञ्ज मुक्तिपुरस्थित लिला प्यालेसमा हुँदैछ ।
सम्मेलन तयारीका सन्दर्भमा आज आयोजना गरिएको पत्रकारसंगको सम्मेलनमा नेपाली कांग्रेसका महामन्त्री गगनकुमार थापा क्षेत्रीय सम्मेलनको प्रमुख अतिथि वक्ताका रुपमा रहनु हुने क्षेत्रीय सभापति रमेशकुमार गुप्ताले जानकारी गराउनुभयो ।
महामन्त्री थापासंगै नेपाली कांग्रेसका केन्द्रीय, प्रदेश तथा जिल्लातहका अन्य नेताहरुको पनि विशेष उपस्थिति रहने जनाइएको छ । सम्मेलनमा क्षेत्रीय कार्यसमितिका साथै प्रदेश क्षेत्र ‘क’ र ‘ख’ को बार्षिक प्रगति प्रतिवेदन, आर्थिक प्रतिवेदन तथा सांगठानिक प्रतिवेदन प्रस्तुत हुने जनाइएको छ ।
पत्रकार सम्मेलनमा क्षेत्रीय सभापति गुप्ताले ‘नवीन कांग्रेस, बलियो कांग्रेस’ बनाउने महामन्त्री थापाको अभियानलाई सम्मेलनले सघाउ पुर्याउने विश्वास ब्यक्त गर्नुभयो । सभापति गुप्ताले सम्मेलनको सबैखाले तयारी पनि पूरा पनि भइसकेको जानकारी गराउनुभयो । सम्मेलनमा ४७० प्रतिनिधिको सहभागिता हुने बताइएको छ ।
पत्रकार सम्मेलनमा केन्द्रीय सदस्य मैकुलाल बाल्मिकीले गणतन्त्र कसैले मास्न नसक्ने प्रष्ट पार्नुभयो । जनताको रगत, पसिनावाट सिँचन भएको मुलुको लोकतान्त्रिक गणतन्त्र कुनै तानाशाहको लहडले मासिन सक्दैन भन्नुभयो । ।
क्षेत्रीय सचिव सुनिलसिंह हमालले सञ्चालन गरेको कार्यक्रममा प्रदेश ‘क’ का सभापति ज्ञानेन्द्रकुमार चौधरी, र ‘ख’ का सभापति जितेन्द्रबहादुर हमाल, क्षेत्रीय सचिव प्रदिप साहु, युवा नेता सुरेन्द्रबहादुर हमाल, लक्ष्मीनारायण शाह, जगतनारायण चौधरी लगायतको उपस्थिति रहेको थियो ।
