नीरज गौतम/नेपालगञ्ज, ६ जेठ । बाँकेको कोहलपुरमा संचालित तीन दिने ‘बिट पत्रकारिता’ तथा पत्रकार आचारसंहिता सम्बन्धि तालिम आज सकिएको छ ।
कोहलपुर नगरपालिकाको सहयोगमा नेपाल पत्रकार महासंघ, बाँकेले तालिम आयोजना गरेको हो । तालिममा कोहलपुर क्षेत्रका झण्डै ५० बढी पत्रकारहरुको सहभागिता रहेको थियो । तालिममा नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई, पूर्व जिल्ला अध्यक्ष नीरज गौतम, वरिष्ठ पत्रकारहरु डक्ट धिताल, रुद्र सुवेदी , कृष्ण अधिकारी, प्रियास्मृति ढकाल, रुपा गहतराज र कमल खत्रीले सहजीकरण गर्नुभएको थियो ।
तालिममा विकास पत्रकारिता, स्वास्थ्य पत्रकारिता, पत्रकारितामा महिलाका एजेण्डा, खोज पत्रकारिता, खेलकुद पत्रकारिता, शिक्षा पत्रकारिता, पत्रकार आचारसंहिता र प्रेस नीति शास्त्र विषयमा सहभागिहरुलाई अभिमुखीकरण गरिएको थियो ।
तालिम समापन समारोहमा प्रमुख अतिथि कोहलपुर नगरपालिकाका उपमेयर संगीता सुवेदीले सहभागिहरुलाई प्रमाणपत्र प्रदान गर्दै नेपालमा अब विद्यागत पत्रकारिताको खाँचो र आवश्यकता बढ्दै गएको छ भन्दै धेरै विषयको जानकार हुनुभन्दा एउटै विषयमा पोख्त हुनु उपयुक्त हुने सुझाव दिनुभयो ।
नेपाल पत्रकार महासंघ, बाँकेका अध्यक्ष नवीन गिरीको अध्यक्षतामा भएको तालिम समापन समारोहमा उपमेयर सुवेदी र प्रमुख प्रशासकिय अधिकृत मानबहादुर गिरीलाई मायााको चिनो र सहजकर्ताहरुलाई प्रशंसापत्र प्रदान गरिएको थियो ।
