नीरज गौतम/
नेपालगञ्ज, ३ जेठ । बाँकेको नौवस्तामा रहेको सशस्त्र प्रहरी बलको तालिम शिक्षालयले आज आफ्नो २४औं स्थापना दिवस मनाएको छ ।
प्रहरी जवान तालिम शिक्षालय प्रमुख प्रहरी बरिष्ठ उपरीक्षक गंगाराम श्रेष्ठको अध्यक्षतामा भएको स्थापना दिवस समारोहमा सशस्त्र प्रहरी अतिरिक्त महानिरीक्षक बंशीराज दाहालले सशस्त्र प्रहरीलाई बदलिँदो समय सापेक्ष थप सुदृढ बनाउदै लगिने छ भन्नुभयो ।
उहाँले तालिम शिक्षालयले सशस्त्र प्रहरी जवान उत्पादनमा महत्वपूर्ण निर्वाह गर्दै आइरहेको छ भन्दै तालिममा सिकेको विषयवस्तुका सैद्धान्तिक पक्षका साथै अनुशासित, इमान्दार र कर्तब्यनिष्ठ भएर काम गर्नुपर्ने खाँचो औल्याउनुभयो ।
कार्यक्रममा कोहलपुरमा मेयर पूर्णप्रसाद आचार्य, बैजनाथ गाउँपालिका उपाध्यक्ष निर्मला रोकाया, लुम्बिनी प्रदेश आन्तरिक मामिला तथा कानुन मन्त्रालयका सचिव लोकबहादुर सुनार, नेपाली सेना चार नम्बर बाहिनी इमामनगरका बाहिनीपति प्रशान्तविक्रम राणा लगायतले बोल्नुभएको थियो ।
त्यस अवसरमा उत्कृष्ट कार्य गर्ने र बिभिन्न विधातर्फको खेल, वक्ततृत्वकला प्रतियोगितामा विजयी हुने प्रहरी कर्मचारीहरुलाई पुरस्कार तथा प्रमाणपत्र प्रदान गरिएको थियो । साथै अमर सशस्त्र प्रहरी शहिदहरुप्रति सम्मान प्रकट गर्दै सहिद स्मारकमा पुष्पगुच्छा अर्पण र बृक्षारोपण र शहिद परिवारलाई सम्मान पनि गरिएको थियो ।
