नेपालगञ्ज, ३१ बैशाख । बाँकेको डुडुवा गाउँपालिकाले जिपिएस प्रणालीमार्फत पालिकाका सबै ६ वटै वडामा अनलाइन घरधुरी सर्भेक्षण शुरु गरेको छ । अनलाइन सफ्टवेयरको प्रयोग गरी गाउँपालिकामा रहेका सम्पुर्ण घरहरुको विवरण संकलन गर्न थालिएको अध्यक्ष नरेन्द्रकुमार चौधरीले बताउनुभयो ।
अनलाइन घरधुरी सर्वेक्षणवाट स्थानीयका समस्या तथा अवस्था पहिचान गर्नमा सहज हुने र त्यसैका आधारमा पालिकालाई योजना, कार्यक्रम तथा बजेट निर्माण गर्न सजिलो बताइएको छ ।
पालिकाले घरधुरी सर्वेक्षण्का लागि तालिम प्राप्त १८ जना सर्भेक्षक खटाएको छ । सवेक्षकहरुले तीन महिनाभित्र विवरण संकलन गरिसक्नुपर्ने समयसीमा तोकिएको प्रमुख प्रशासकिय अधिकृत अशोककुमार पाण्डेयले जानकारी दिनुभयो । तथ्यांक अनुसार, डुडुवावा झण्डै १० हजार घरधुरी रहेका छन् ।
