नेपालगञ्ज, २९ बैशाख । जिल्ला प्रहरी कार्यालय बाँकेका प्रमुख प्रहरी उपरीक्षक रामप्रसाद घर्तीमगरले शान्ति, सुरक्षा तथा सुव्यवस्था कायम राख्न सबैखाले प्रयास गरिने बताउनुभएको छ ।
जिल्ला प्रहरी कार्यालयमा आज आयोजना गरिएको पत्रकार परिचयात्मक अन्तरक्रिया कार्यक्रममा जिल्ला प्रहरी प्रमुख घर्तीमगरले विधिको शासनको अधिनमा रही जिल्लाको सुरक्षा व्यवस्थालाई थप प्रभावकारी बनाउन लागिपर्ने प्रतिबद्धता पनि जनाउनुभयो ।
जिल्ला प्रहरी प्रमुख घर्तीमगरले जिल्लामा क्रियाशिल व्यवसायिक पत्रकार तथा संचार संस्थाहरुसंगको सहकार्यमा जिल्ला प्रहरी कार्यालयलाई थप सूचनामैत्री बनाइने विश्वास समेत दिलाउनुभयो ।
नेपाल पत्रकार महासंघ बाँकेका अध्यक्ष नवीन गिरीले आपसी विश्वास, सहकार्य र पारदर्शितामा आधारित रहदै गुण र दोषका आधारमा निष्पक्ष ढंगले प्रहरीले ब्यवहार गर्नुपर्नेमा जोड दिनुभयो ।
कार्यक्रममा जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक दिपक पातली लगायत प्रहरी अधिकृत तथा पत्रकारहरुको उपस्थिति रहेको थियो ।
