नेपालगञ्ज, १९ चैत । राजावादीहरुले गरेको हिंसात्मक आन्दोलनमा पत्रकार हत्या, आक्रमण तथा सञ्चारगृहमा भएको आगजनी र तोडफोडको घटनामा संलग्नलाई कारबाहीको माग गर्दै नेपाल पत्रकार महासंघ, बाँकेले सरकारलाई ज्ञापनपत्र बुझाएको छ ।
नेपाल पत्रकार महासंघ बाँकेका अध्यक्ष नवीन गिरी नेतृत्वको बाँके पत्रकारको टोलीले जिल्ला प्रशासन कार्यालयमार्फत आज सरकारलाई ज्ञापनपत्र बुझाएको हो ।
गत चैत १५ गते काठमाडौंको तिनकुनेमा राजावादीहरुको हिंसात्मक प्रदर्शनका क्रममा भिडियो खिच्दै गर्दा आगोमा जलेर ज्यान गुमाएका पत्रकार सुरेश रजक हत्याको अनुसन्धान गरी हत्यामा संलग्नलाई कारबाही गर्न तथा उहाँको परिवारलाई क्षतिपूर्ति दिनुपर्ने माग ज्ञापनपत्रमा उल्लेख गरिएको छ ।
सहायक प्रमुख जिल्ला अधिकारीलाई खडानन्द खत्रीलाई ज्ञापनपत्र हस्तान्तरण गरिएको ज्ञापनपत्रमा सञ्चार माध्यम र सञ्चारकर्मीमाथि आक्रमण गर्ने सबैलाई कानुनी कठघरामा ल्याउन तथा क्षति पु¥याइएका सञ्चारगृह र सञ्चारकर्मीलाई यथोचित क्षतिपूर्तिका साथै घाइते पत्रकारको उपचारको प्रवन्ध मिलाउन माग गरिएको छ ।
ज्ञापनपत्रमा भनिएको छ—‘यदि, एक साताभित्र माग पूरा हुने विश्वसनीय आधार नदेखिए महासंघ आन्दोलनमा उत्रिन बाध्य हुनेछ ।’
विगतमा प्रेस तथा अभिव्यक्ति स्वतन्त्रता हननका घटनाहरूमा संलग्नहरूलाई तत्काल कानुनी कारबाही गर्नुपर्ने र भविष्यमा सञ्चारमाध्यम र सञ्चारकर्मीको सुरक्षाको उचित प्रवन्ध मिलाउनुपर्ने माग समेत ज्ञापनपत्रमा समेटिएको अध्यक्ष गिरीले बताउनुभयो ।
ज्ञापनपत्र बुझाउन पत्रकार महासंघ लुम्बिनी प्रदेश अध्यक्ष शुक्रऋषि चौलागाई, बाँके शाखाका पूर्व अध्यक्षहरु निरज गौतम, झलक गैरे, नेपाल प्रेस युनियन बाँकेका अध्यक्ष प्रियास्मृति ढकाल, प्रेस चौतारी नेपाल बाँकेका अध्यक्ष कमल डाँगी, समाजवादी प्रेस संगठन बाँकेका अध्यक्ष लोकनाथ शर्मा लगायत पत्रकारहरु जिल्ला प्रशासन कार्यालय पुगेका थिए ।
