नेपालगञ्ज, २१ चैत । नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डले गणतन्त्रका विरोधीहरु अहिले राजावादीको भेषमा सल्बलाएका छन् भन्नुभएको छ ।
प्रेस सेन्टर नेपाल बाँके शाखाले आज नेपालगञ्जमा गरेको पत्रकार सम्मेलनमा अध्यक्ष प्रचण्डले राजतन्त्र नेपालमा अब कुनै पनि हालतमा राजतन्त्र फर्कन नसक्ने प्रष्ट पार्दै चिहानवाट कोही पनि बाचेको इतिहास छैन भन्नुभयो ।
अध्यक्ष प्रचण्डले लोकतन्त्रमाथि आक्रमणको कोशिस भएपनि प्रमुख दलहरु सबै गणतन्त्रप्रति प्रतिबद्ध रहेकोले विद्यमान व्यवस्थालाई अझ सुदृढ र समृद्ध बनाउँदै लैजानुपर्ने आवश्यकतामा जोड दिनुभयो ।
सरकार सही ढंगले अगाडि बढ्न नसकेको टिप्पणी गर्दै अध्यक्ष प्रचण्डले जनभावनालाई ख्याल गरेर सरकार र राजनीतिक दलहरु ऋघि बढ्नुपर्ने खाँचो रहेको छ भन्नुभयो ।
पत्रकारद्धारा सोधिएको एक प्रश्नको जवाफममा अध्यक्ष प्रचण्डले संविधान संशोधनका लागि आफ्नो पार्टी तयार रहेको छ भन्दै संशोधनअघि समिक्षा गर्नुपर्नेमा जोड दिनुभयो ।
