नेपालगञ्ज, १६ चैत । सामाजिक, गैरसरकारी संस्था तथा साझेदारी विकास शाखाको संयुक्त आयोजनामा आज शनिवार नेपालगञ्जमा क्रियाशील गैरसरकारी संस्थाहरुको प्रगति समिक्षा र प्रस्तुतिकरण कार्यक्रम गरिएको छ ।
नेपालगञ्ज उपमहानगरपालिकाको गैरसरकारी संस्था समन्वय समितिको निर्णय अनुसार प्रगति समिक्षा कार्यक्रम गरिएको हो ।
कार्यक्रममा गत आर्थिक बर्ष २०८०÷८१ मा गैरसरकारी संस्थाहरुले नेपालगञ्ज उपमहानगरपालिका क्षेत्रमा सञ्चलन गरेको परियोजनाका साथै चालू आर्थिक वर्षको फागुन मसान्तसम्म भएका परियोजनाहरुको प्रगति समिक्षा र प्रस्तुतिकरण गरिएको सामाजिक, गैरसरकारी संस्था तथा साझेदारी विकास शाखा प्रमुख कृष्णप्रसाद जोशीले जानकारी दिनुभयो ।
कार्यक्रममा ५० वटा संस्थाका प्रमुख एवम् प्रतिनिधिहरुले आ—आप्नो संस्थाद्धारा संचालित परियोजना कार्यक्रमको प्रस्तुतिकरण गर्नुभएको थियो । नेपालगञ्जमा गैरसरकारी संस्थाहरुले उपमहानगरपालिकाको पूर्व सहमति लिएर काम गर्नुपर्ने प्रावधान छ । जसअनुसार, कुन गैरसरकारी संस्थाको कार्य क्षेत्र कुन हो, बजेट कति हो, कुन क्षेत्रमा काम गर्ने हो तथा दातृ निकाय कुन हो भन्ने विषयमा कार्यक्रममा जानकारी गराइएको थियो । प्रस्तुत परियोजना कार्यक्रममाथि सहभागिहरुद्धारा छलफल समेत भएको थियो ।
प्रगति समिक्षा कार्यक्रम समापन कार्यक्रममा मेयर प्रशान्त विष्ट, प्रमुख प्रशासकीय अधिकृत ओमबहादुर खड्का, विपद समिति संयोजक समिरप्रताप सिंह, योजना तथा सुशासन समिति संयोजक भरतध्वज शाही, पूर्वाधार विकास समिति संयोजक बसन्तकुमार कनौजिया, विधायन समिति संयोजक मोहम्मद मुजम्मिल हलवाई लगायतको उपस्थिति रहेको थियो ।
