नेपालगञ्ज, ११ चैत । बाँकेको नौवस्ता औद्योगिक क्षेत्र निर्माणस्थलको अतिक्रमण हटाउने र सिमांकनको काम आजवाट शुरु गरिएको छ ।
प्रमुख जिल्ला अधिकारी धर्मराज जोशीको अगुवाईमा गत बिहीवार बसेको सर्वदलीय र सर्वपक्षीय बैठकले अतिक्रमण हटाउने सहमति भएको थियो । उक्त औद्योगिक क्षेत्र योजना अन्तर्गतको अतिक्रमित ५५ विगाहा जग्गा छाडेर बाँकी जग्गामा कानुन बमोजिम काम शुरु गर्न बैठकमा सहभाति भएको छ ।
औद्योगिक क्षेत्र ब्यवस्थापन लिमिटेडका महाप्रबन्धक पदम ओलीका अनुसार, आजवाट सिमांकनमा परेका घरटहरा हटाउँदै बाटो निर्माणको काम पनि सुरु गरिएको छ ।
लुम्बिनी प्रदेशस्तरीय नौवस्ता औद्योगिक क्षेत्र निर्माण योजना बाँकेको बैजनाथ गाउँपालिका वडा नं. ३ मा पर्दछ । उक्त स्थानमा जग्गा अतिक्रमण गरी बसेकाहरुले स्थान छाड्न नमानेपछि झण्डै १० वर्षदेखि उक्त योजना कार्यान्वयनमा आउन सकेको थिएन ।
