नेपालगञ्ज, ३० माघ । बागेश्वरी असल शासन क्लब (बास) नेपालका पूर्ब केन्द्रीय सदस्य स्वर्गीय रुक्मिणी शाहको जन्म जयन्तीमा नेपालगञ्जका अपाँगता भएका एक जनालाई ह्विलचीयर उपलव्ध गराइएको छ ।
बासले स्थापना गरेको रुक्मिणी स्मृति अक्षय कोषबाट नेपालगञ्ज वडा नं. २२ का ५५ बर्षीय भण्डारी किंगरियालाई ह्विलचीयर उपलव्ध गराइएको सूचना अधिकारी हेमराज भट्टले जानकारी दिनुभयो ।
एक कार्यक्रमका बीच लुम्विनी प्रदेश सांसद अम्बिका काफ्ले, बासका निबर्तमान अध्यक्ष रमेश सिटौला, उपाध्यक्ष शिवकुमार वर्मा, कोषाध्यक्ष कल्पना अधिकारी, कार्यकारी निर्देशक नमस्कार शाहलगायतले किंगरियालाई ह्विलचीयर लगायतका सहयोग प्रदान गर्नुभएको थियो ।
चार महिना पहिले गत कार्तिक १ गते नेपालगञ्जको पुरैनी किंगरियनपुरमा मोटरसाईकल दुर्घटनामा घाइते भएका किंगरियाको दायाँ खुट्टा भाँचिएको थियो । भारतको लखनउमा खुट्टाको शल्यक्रिया गर्दा झण्डै सवा आठ लाख खर्च भएपछि किंगरियाको आर्थिक अवस्था कमजोर बनेको छ । सोही अवस्थालाई दृष्टिगत गरी बासले किंगरियालाई ह्विलचीयन उपलव्ध गराउने निर्णय गरेको हो ।
बास नेपालका कार्यकारी निर्देशक एवम् स्वर्गीय रुक्मिणीका दाई नमस्कार शाहले उनको सम्झनामा बिभिन्न सामाजिक कार्यहरु गरिरहेको बताउनुभयो । कार्यक्रममा सांसद काफ्लेले आवश्यक भएको व्यक्तिलाई सहयोग गरेकोमा खुशी व्यक्त गर्नुभयो ।
