नेपालगञ्ज, २८ माघ । होप इन्टरनेशनल स्कुल मेयर कप अन्तर विद्यालय छात्र फुटबलको सेमिफाइनलमा प्रवेश गरेको छ भने धम्बोझी, मोर्डन, युनाइटेड र मनकामना स्कुल क्वाटरफाइनलमा प्रवेश गरेका छन् ।
नेपालगञ्ज रंगशालामा आज भएको खेलमा होप इन्टरनेशनल स्कुलले ब्राइटल्याण्ड स्कुललाई ३–१ ले पराजित गरेको छ । होपको जितमा सन्दिप केसीले २ गोल र अस्मित थापामगरले १ गोल गरेका थिए ।
खेलका प्लेयर अफ द म्याच सुदिप केसीलाई नेकपा एमाले बाँकेका उपसचिव किशोर थापा र जिल्ला खेलकुद विकास समिति बाँकेका कार्यालय प्रमुख सन्तोष श्रेष्ठले पुरस्कर प्रदान गर्नुभएको थियो ।
यस्तै, हिजो कमजोर प्रकाशका कारण धम्बोझी मावि सिद्धार्थ विद्या सदनबीच भएको खेल आज पुनः खेलाइएको थियो । आज भएको खेलमा धम्बोझीले सिद्धार्थलई ४–२ गोलले हराएको छ । निर्धारित समयको खेल गोलरहित बराबरीमा सकिएको थियो । पेनाल्टी सुटआउटमा धम्बोझीका दिनेश रोकाय, समिर मगर, कृस जिएम र तुफान शाहीले गोल गरेका थिए । सिद्धार्थका लागि जेनिश थारु र राज खत्रीले गोल गरेका थिए । खेलमा प्लेयर अफ द म्याचको पुरस्कार धम्बोझीका गोलकिपर प्रेम खत्रीलाई प्रदान गरिएको थियो ।
आजै भएको अर्को खेलमा मोर्डन पब्लिक स्कुलले जीवन ज्योती स्कुललाई २–१ ले हराएको छ । मोर्डनको जितमा सुमित चौधरी र कबीर विष्टले गोल गरेका थिए । त्यस्तै, युनाइटेड एजुकेशन स्कुलले मंगल प्रसाद माविलाई ३–० ले हराएको छ भने चौथो खेलमा मनकामना स्कुलले सगरमाथा स्कुललाई सडनडेथ ५–४ ले पराजित गरेको छ ।
बाँके जिल्ला फुटबल संघको आयोजनामा सुरु भएको प्रतियोगिताको छात्र तर्फ २१ टिम र छात्रा तर्फ ६ टिमको सहभागिता रहेको छ । प्रतियोगिताको फाइनल खेल फागुन ३ गते हुनेछ ।
