नेपालगञ्ज, २२ माघ । बाँकेमा पाठेघर मुखको क्यान्सरविरुद्ध खोप लगाउन सुरु गरिएको छ । नेपालगञ्ज वडा नम्बर १ स्थित धम्बोझी माविमा आज भएको कार्यक्रममा मेयर प्रशान्त विष्ट खोप लगाउने कार्यको शुभारम्भ गर्नुभयो ।
विद्यालयमा अध्ययनरत कक्षा ६ देखि १० सम्मका र विद्यालय बाहिर रहेका १० देखि १४ वर्ष उमेर समूहका ३६ हजार ९५० किशोरीलाई पाठेघर मुखको क्यान्सरविरुद्ध ‘ह्युमन पापिलोमा भाइरस’ (एचपीभी) खोप लगाइने स्वास्थ्य कार्यालय बाँकेका जनस्वास्थ्य अधिकृत नरेशबाबु श्रेष्ठले बाँकेमा जानकारी दिनुभयो ।
श्रेष्ठका अनुसार, बाँकेमा ४५९ वटा खोप केन्द्र तोकिएको छ । त्यसमध्ये ३७८ खो केन्द्र विद्यालयमा र ८१ वटा विद्यालय बाहिर रहेका छन् । पहिलो चरणमा बाँकेको नेपालगञ्ज उपमहानगरपालिका, कोहलपुर नगरपालिका, खजुरा गाउँपालिका र जानकी गाउँपालिकाका २२ हजार ५८९ किशोरीलाई फागुन एक गतेसम्म खोप लगाइने छ ।
स्वास्थ्य कार्यालय बाँकेले राप्तीसोनारी, बैजनाथ, डुडुवा र नरैनापुर गाउँपालिकाका १२ हजार ३६१ किशोरीलाई माघ ३० गतेदेखि दोस्रो चरणको खोप लगाउने लक्ष्य निर्धारण गरेको जनाइएको छ ।
२०८१÷१०÷२२
