नेपालगञ्ज, १४ पुस । नेपालगन्जमा हुनलागेको प्रथम लुम्बिनी कप महिला फुटबल प्रतियोगिताको सल्लाहकारमा बरिष्ठ फुटबलकर्मी गोवद्र्धन सिंह सम्झना र प्रदेशसिंह राठौरलाई मनोनयन गरिएको छ । आयोजक अन्तरालले उहाँहरुलाई प्रतियोगिताको सल्लाहाकारमा आज मनोनयन गरेको हो ।
बरिष्ठ फुटबलकर्मी सिंह अखिल नेपाल फुटबल संघ (एन्फा) का पूर्व उपाध्यक्ष हुनुहुन्छ भने राठौर एन्फाका पूर्व केन्द्रीय सदस्य र बाँके जिल्ला फुटवल संघका पूर्व अध्यक्ष हुनुहुन्छ ।
अन्तरालका कार्यकारी प्रमुख जय नारायण शाहले फुटबल क्षेत्रका महत्वपूर्ण व्यक्तिलाई सल्लाहकारको रुपमा नियुक्त गर्न पाउँदा खुसी लागेको बताउनु भएको छ ।
उहाँले भन्नु भयो, ‘लुम्बिनी कप महिला फुटबल महिला खेलाडीलाई अवसर प्रदान गर्न आयोजना गर्न लागिएको हो । यसले फुटबल खेलाडीको स्तरवृद्धि गर्नुका साथै पश्चिम नेपालको खेल, पर्यटन तथा व्यवसायिक क्षेत्रको विकासमा सहयोग गर्नेछ ।’
प्रतियोगिताका सहयोगी बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाहीले प्रतियोगिताले पश्चिम नेपालको फुटबल विकासमा महत्वपुर्ण भुमिका खेल्ने विश्वास व्यक्त गर्नुभयो ।
उहाँले भन्नु भयो, ‘लुम्बिनी कप महिला फुटबल प्रतियोगिता हाम्रो लागि विशेष छ ।’
लुम्बिनी कप महिला फुटवल प्रतियोगिता आगामी फागुन १९ गतेदेखि २९ गतेसम्म नेपालगन्जमा आयोजना हुँदैछ।
नेपालगन्ज रंगशालामा हुने प्रतियोगितामा नेपाल र छिमेकी मित्रराष्ट्र भारतका गरी आठ टिम सहभागी हुने जनाइएको छ ।
