नेपालगञ्ज, १२ पुस । युवा तथा खेलकुद मन्त्री तेजुलाल चौधरीले नेपालमा महिला फुटबलको उच्चतम विकासको खाँचो रहेको बताउनुभएको छ ।
नेपालगञ्ज रंगशालामा रहेको लुम्बिनी कप महिला फुटबलको सचिवालय निरीक्षणका क्रममा मन्त्री चौधरीले दक्ष खेलाडी उत्पादनका लागि लुम्बिनी कप महिला फुटबलले महत्वपूर्ण अवसर सिर्जना गर्नसक्ने विश्वास समेत व्यक्त गर्नुभयो ।
मन्त्री चौधरीले लुम्बिनी कप महिला फुटबल शुरुवात हुनु राष्ट्रका लागि गौरवको विषय भएको हो भन्नुभयो । लुम्बिनी कप महिला फुटबलको सफलताको शुभकामना व्यक्तसमेत गर्दै मन्त्री चौधरीले प्रतियोगितालाई निरन्तरता दिन पनि आग्रह गर्नुभयो ।
त्यस अवसरमा लुम्बिनी प्रदेश खेलकुद विकास परिषद्का सदस्यसचिव टिरन गौतमले लुम्बिनी कप महिला फुटबलले प्रदेशकै लागि कोशेढुंगा सावित हुने विश्वास व्यक्त गर्नुभयो । उहाँले प्रतियोगितालाई सफल बनाउन लुम्बिनी प्रदेश खेलकुद विकास परिषद्ले सक्दो सहयोग गर्ने प्रतिवद्धता जनाउनु भयो । ‘हामीले प्रतियोगितालाई दृष्टिगत गरेर नेपालगञ्ज रंगशालाको मैदान व्यवस्थापनका लागि राष्ट्रिय खेलकुद परिषदसँग बजेट माग गरेका छौ’—सदस्यसचिव गौतमले भन्नुभयो ।
अन्तरालको आयोजना र बाँके जिल्ला फुटबल संघको सहकार्यमा लुम्बिनी कप महिला फुटबल प्रतियोगिता आगामी फागुन १९ गतेदेखि २९ गतेसम्म नेपालगञ्जमा आयोजना हुँदैछ ।
प्रतियोगितामा नेपाल र छिमेकी मित्र राष्ट्र भारतका समेत गरी आठ टिम सहभागी हुने अन्तरालका प्रमुख कार्यकारी जयनारायण शाहले बताउनु भयो । प्रतियोगिता पश्चिम नेपालकै गर्व गर्न लायक इभेन्ट बन्नुका साथै पर्यटन विकासमा समेत कोशेढुंगा सावित हुने शाहको भनाइ छ ।
यसैबीच, मन्त्री चौधरीले आजै मध्यपश्चिम क्षेत्रीय खेलकुद विकास समितिको भौतिक पूर्वाधार तथा वस्तुस्थितिका बारेमा जानकारी लिनुभएको छ । त्यस क्रममा मन्त्री चौधरीलाई क्षेत्रीय खेलकुद विकास समितिका प्रमुख महेश चन्दले समितिको भौतिक अवस्था र खेल गतिविधि बारे जानकारी गराउनुभएको थियो ।
निरीक्षण टोलीमा लुम्बिनी खेलकुद विकास परिषद्का निवर्तमान सदस्यसचिव भीम ओलीलगायतको सहभागिता रहेको थियो ।
