नेपालगञ्ज, १३ पुस । अवधी भाषामा अनुवादित नेपालको संविधान—२०७२ कानून, न्याय तथा सँसदीय मामिला मन्त्रालयलाई हस्तान्तरण गरिएको छ ।
डुडुवा गाउँपालिका बाँकेको आर्थिक सहयोगमा सूचना र मानवअधिकार अनुसन्धान केन्द्र नेपालगञ्जले प्रकाशनमा ल्याएको अवधि भाषामा अनुवादित नेपालको संविधान २०७२ को प्रकशितप्रति संस्थाका सल्लाहकार एवम् कानूनकर्मी सन्तोष रेग्मीले मन्त्रालयका सचिव उदयराज सापकोटालाई हस्तान्तरण गर्नुभएको हो ।
मन्त्रालयमा आयोजित एक समारोहकाबीच केन्द्रका सल्लाहकार रेग्मीले संविधान हस्तान्तरण गर्दै प्रकाशनका भाषिक तथा प्राविधिक पक्षका बारे जानकारी गराउनुभएको थियो ।
त्यस अवसरमा मन्त्रालयका सचिव सापकोटाले अवधीभाषी समुदायका लागि संविधान पढ्न र बुझ्न मद्दत पुग्ने विश्वास व्यक्त गर्दै सबै अवधीभाषीलाई संविधान पढन आग्रहसमेत गर्नुभयो ।
यसैबिच, अवधि भाषामा अनुवादित नेपालको संविधान—२०७२ भाषा आयोगमा पनि पठाइएको छ । भाषा आयोगले बहुप्रचलनमा रहेका १२ वटा स्थानीय भाषामा सँविधान अनुवाद गरेर जनतालाई वितरण गर्न सरकारलाई निर्देशन समेत दिएको छ ।
अवधि भाषामा प्रकाशित संविधान सूचना र मानवअधिकार अनुसन्धान केन्द्र नेपालगञ्जले समुदायस्तरमा निःशुल्क वितरण गर्दैआएको अध्यक्ष अधिवक्ता विश्वजित तिवारीले बताउनुभयो ।
