नेपालगञ्ज, २९ मंसिर । नेपाल पत्रकार महासंघ बाँकेको अध्यक्षमा व्यवसायिक प्यालका नवीन गिरी निर्वाचित हुनुभएको छ । गिरी नेपाल प्रेस युनियन लुम्बिनी प्रदेशका महासचिव समेत हुनुहुन्छ । गिरीले ११८ मत पाउनुभएको थियो । उहाँका निकटतम् प्रतिद्धन्दी साझा प्यानलका प्रदिप वाग्लेले ७० मत पाउनुभएको थियो । अध्यक्ष पदमा प्रेस चौतारीवाट विद्रोही गरी उठेका विश्वराज पछलडंग्याले भने १९ मत मात्र पाउनुभएको थियो ।
यस्तै महासंघ, बाँकेको उपाध्यक्षमा तिलक गाउँले र रेजिना मल्ल निर्वाचित हुनुभएको छ । गाउँले र मल्ल दुबैले समान १०२ मत प्राप्त गर्नुभएको छ । दुवै जनाले पालैपालो कार्यकाल संचालन गर्ने सहमति जनाउनुभएको छ । तीन वर्षको कार्यकालमा पहिलो डेढ वर्ष गाउँलेले र बाँकी अवधिको कार्यकाल मल्लले संचालन गर्ने लिखित सहमति भएको छ ।
यसैगरी, व्यवसायिक प्यानलका करुणा शाह एक मत अन्तरले महिला उपाध्यक्षमा निर्वाचित हुनुभएको छ । शाहले आफ्ना निकटतम् प्रतिद्धन्द्धी साबित्री गिरीलाई १ मतले पराजित गर्नुभएको छ । शाहले १०२ र गिरीले १०१ मत प्राप्त गर्नुभएको छ । सचिवमा कृष्णबहादुर वली निर्वाचित हुनुभयो । वलीले आफ्ना प्रतिद्धन्दी व्यवसायिक प्यानलका सकिलअहमद काँदरीलाई १० मतले पराजित गर्नुभएको छ । वलीले १०७ र कादरीले ९७ मत प्राप्त गर्नुभएको छ ।
मुख्य निर्वाचन अधिकृत शरण कर्माचार्यका अनुसार, सहसचिव खुल्लामा रबिन्द्र सिंह ठकुरी, समावेशी सहसचिवमा भगतराम थारु, कोषाध्यक्षमा सुनिल रेग्मी, महिला सदस्यमा रजनी योगी, दलित सदस्यमा आशा परियार, आदीबासी जनजाति सदस्यमा निर्मला चौधरी, मधेसी सदस्यमा यदुराज मिश्र र समावेशी सदस्यमा सलामतअलि शेष निर्वाचित हुनुभएको छ ।
यस्तै, खुल्ला सदस्यहरुमा पहल बहादुर केसी, सम्भुप्रसाद थारु, कृष्णराज अधिकारी, रबिन्द्र घिमिरे, समिरमान श्रेष्ठ, साबित्री बिश्वकर्मा, सजनकुमार आरसी र धना बिष्ट केसी निर्वाचित हुनुभएको छ ।
नेपाल पत्रकार महासंघ, बाँकेका कूल २४२ मतदाता मध्ये निर्वाचनमा २१८ मत खसेको थियो ।
