नेपालगञ्ज, २३ मंसिर । बाँकेको राप्तीसोनारी गाउँपपालिका वडा नं. २ माथेबासका वन्यजन्तु प्रभावितहरुले समयमै राहत र क्षतिपूर्ति पाउन नसकेको गुनासो गरेका छन् ।
‘वन्यजन्तुले निरन्तर जनधनको क्षति गरिरहेको छ, तर हामीले समयमै क्षतिपूर्ति पाउन सकेका छैनौ’—पीडितहरुको गुनासो छ ।
समुदायका लागि सञ्चार अभियान नेपाल (सीसीएन) ले आयोजना गरेको ‘वातावरणीय न्याय र जवाफदेहिताका लागि गोलघर सम्वाद’ का सहभागीहरुले भने, ‘माथेबासमा हात्ती, बाघ र बाँदरलगायतका वन्यजन्तुले निरन्तर दुःख दिइरहने र जनधनको क्षति गरि नै रहन्छ, तर हामीले त्यसवाट उन्मुक्ति पाउन सकेका छैनौ र हामीलाई उचित समयमा राहत र क्षतिपूर्ति समेत दिने गरिएको छैन् ।’
वन्यजन्तुवाट प्रभावित स्थानिय चित्रबहादुर डांगीले भण्डारण गरेको अन्न समेत वन्यजन्तुले खाइदिने गरेको दुखेसो पोख्नुभयो । त्यस्तै, जनमुखी सामुदायिक वन उपभोक्ता समितिका अध्यक्ष टोपबहादुर खड्काले भन्नुभयो, ‘वन घना भएपछि वन्यजन्तु भइहाल्दो रहेछ, बाघले मेरो गाउँका छिमेकी केशबहादुर वलीको दुई वटा जर्सी गाइ खाइदिएको धेरै भयो, तर त्यसको क्षतिपूर्ति उहाँले अहिलेसम्म पनि पाउनुभएको छैन ।’
यसैगरी, हात्तीको आक्रमणबाट लामो समयदेखि उपचारत ३४ वर्षीया लक्ष्मी बोहोराले अहिलेसम्म उपचार खर्च नपाएको गुनासो गर्नु भयो । उहाँले उपचारका क्रममा रु तीन लाख खर्च भइसकेको बताउनुभयो ।
कार्यक्रममा सीसीएनका कार्यकारी निर्देशक तुला अधिकारीले वन्यजन्तु प्रभावितहरुकालागि राहत र क्षतिपूर्ति सम्बन्धि भएका व्यवस्था र पाउने प्रकृयाबारे सचेतनाका लागि गोलघर सम्बाद सुरु गरिएको हो भन्नुभयो । गोलघर सम्वाद कार्यक्रमको सहजीकरण बरिष्ठ पत्रकार जनक नेपालले गर्नुभएको थियो ।
युएसएड÷द एसिया फाउण्डेशनद्धारा संचालित ‘नागरिक समाज र मिडिया’ परियोजनाको साझेदारीमा संचालित ‘वातावरणीय न्याय र जवाफदेहिताका लागि सिमान्तकृत समुदायको सबलीकरण अभियान’ अन्तर्गत सम्वाद गरिएको सीसीएनले जनाएको छ ।
कार्यक्रममा ३५ जना स्थानीयहरुको सहभागिता रहेको थियो ।
२०८१÷०८÷२३
