नेपालगञ्ज, २० मंसिर । २१औं राष्ट्रिय महिला सामुदायिक स्वास्थ्य स्वयमसेविका दिवसका अवसरमा नेपालगञ्ज उपमहानगरपालिकाले आज तीन जना महिला सामुदायिक स्वास्थ्य स्वयमसेविकालाई जनही नगद रु ५० हजारसहित सम्मान गरेको छ ।
नियमानुसार ६० वर्ष उमेर हदका कारण अवकाश पाएका नेपालगञ्ज वडा नं. १० की बीना थापामगर, १४ की सुरसती बृजबासी र वडा नं. ९ की मीनाकुमारी विश्वकर्मा चौधरीलाई नगदसहित सम्मान गरिएको हो ।
नेपालगञ्ज उपमहानगरपालिकाका अलावा अवकाश प्राप्त स्वयमसेविकाहरुले संघीय सरकारको तर्फबाट रु ५० हजार र प्रदेश सरकारबाट रु २० हजार समेत पाउने छन् ।
कार्यक्रममा नगर प्रमुख प्रशासन्त विष्टले अवकाश प्राप्त स्वयमसेविकालाई नगदसहित दोसल्ला ओढाएर सम्मान गर्नुभयो ।
सामुदायिक स्वास्थ्य स्वयमसेविका संघ नेपालगञ्जकी अध्यक्ष मनकुमारी सिलवालको अध्यक्षतामा भएको कार्यक्रममा नेपालगञ्जमा कार्यरत सबै महिला स्वयमसेविकालाई पनि सम्मान गरिएको थियो । नेपालगन्ज उपमहानगरपालिकामा १९२ जना र बाँके जिल्लाभरिमा ७८५ जना स्वय्मसेविका कार्यरत छन् ।
त्यस अवसरमा राष्ट्रिय मानव अधिकार आयोग लुम्बिनी प्रदेश कार्यालय नेपालगञ्जका अधिकृत धनराज शाही, वडा नं. २० का वडा अध्यक्ष कौशलकुमार धोबी, कार्यपालिका सदस्य संगिता रेग्मी, प्रहरी निरीक्षक शिवा थापा लगायतले समुदायमा महिला स्वास्थ्य स्वयंसेविकाको भूमिकाका बारेमा बोल्नुभएको थियो ।
दिवसकै अवसरमा यसअघि नेपालगञ्जमा प्रभातफेरि समेत गरिएको थियो ।
