नेपालगञ्ज, ३१ भदौ । कर्मचारी संचय कोषको सेवा, सुविधालाई संचयकर्ताको हितमा थप प्रभावकारी बनाउनुपर्नेमा जोड दिइएको छ ।
कोषको ६३ औं बार्षिकोत्सवका अवसरमा आज बाँकेको कोहलपुरमा आयोजना गरिएको कार्यक्रमका अतिथि वक्ताहरुले प्रविधिको विकाससंगै कोषको सेवा संचयकर्ताहरुका लागि सरल र सहज भएता पनि सेवा प्रवाहको दायरा अझ बढाउदै लैजानुपर्ने सुझाव समेत दिएका छन् ।
कोषको कोहलपुर शाखा कार्यालयद्धारा आयोजना गरिएको कार्यक्रमका प्रमुख अतिथि बाँकेका प्रमुख जिल्ला अधिकारी खगेन्द्रप्रसाद रिजालले सरकारी तथा निजि क्षेत्रका कर्मचारीको रकमवाट संचालनमा आएको कोषको सबैखाले प्रतिफल कर्मचारीले पाउनुपर्छ भन्नुभयो ।
सभाध्यक्षको आसनवाट कोषका कोहलपुर शाखा प्रमुख शशिकुमार देवकोटाले बार्षिकोत्सवका अवसरमा कोषले आप्नो कामको समिक्षा गर्ने र प्राप्त सुझावका आधारमा सेवा प्रवाहको अवस्थालाई परिस्कृत गर्दै जाने प्रतिबद्धता जनाउनुभयो ।
कार्यक्रममा कोषका कोहलपुर शाखा सशस्त्र प्रहरी बल ३० नं. गणका प्रमुख प्रहरी उपरीक्षक बिमल डांगी, कर्मचारी मिलन केन्द्रका अध्यक्ष गोविन्द पाण्डे, त्रिभुवन मावि कोहलपुरका प्रधानाध्यापक देवीका बस्नेत थापा, कोषका कर्मचारी मोहनराज कंडेल, नवीन पौडेललगायतले बोल्नुभएको थियो ।
बार्षिकोत्सवका अवसरमा कोषको कोहलपुर शाखा कार्यालयले आयोजना गरेको विभिन्न विद्याका खेलकुद प्रतियोगिताका विजयी कर्मचारीलाई प्रमुख अतिथि प्रमुख जिल्ला अधिकारी रिजालले पुरस्कार तथा प्रमाणपत्र प्रदान गर्नुभएको थियो ।
