नेपालगञ्ज, ३० भदौ । युके एड तथा स्टार फन्ड नेटवर्कको सहयोग र प्लान इन्टरनेशनल नेपालसंगको साझेदारीमा बाँकेमा सञ्चालित भारी वर्षा र जलमग्नता पूर्वानुमान परियोजनाको एक उच्चस्तरीय टोलीले अनुगमन गरेको छ ।
बाँकेका सहायक प्रमुख जिल्ला अधिकारी लालबहादुर गुरुङको नेतृत्वमा रहेको उच्चस्तरीय टोलीले जिल्लाको नरैनापुर गाउँपालिका वडा नं. ६ र राप्तीसोनारी गाउँपालिका वडा नं. ७ मा परियोजना अन्तर्गत संञ्चालित कामको अनुगमन गरेको हो । उक्त टोलीले नरैनापुर वडा नं. ६ गंगापुरमा स्वास्थ्य चौकीको मर्मत कार्य र सुरक्षित आश्रय भवनको अग्लो स्थानमा जडान गरिएको ह्याण्ड पम्पको निरीक्षण समेत गरेको छ ।
उच्चस्तरीय टोलीमा सहभागि बाँके युनेस्को क्लबका अध्यक्ष रवि तुलाधरका अनुसार, अनुगमन टोलीले राप्तीसोनारी गाउँपालिका वडा नं. ७ सर्रामा रहेको स्वास्थ्य चौकीको भ्रमण गरी त्यहा भइरहेको मर्मत कार्य र अग्लो स्थानमा राखिएको ह्याण्ड पम्प तथा पोखरा माता मन्दिर परिसरमा रहेको सुरक्षित आश्रय भवन र अग्लो स्थानको ह्याण्ड पम्पको मर्मत कार्यको अवलोकन समेत गरेको थियो ।
त्यस्तै, अनुगमन टोलीले नगदका लागि श्रम कार्यक्रम अन्तर्गत समुदायका मानिसहरूले ती स्थानमा रहेका नहरहरूको सफाई सम्बन्धि कामको पनि अवलोकन गरेको थियो । परियोजना अन्तर्गत यी सबै तयारी कार्यहरू बाढीको समयमा प्रभावित मानिसहरूलाई सुरक्षित स्थानमा राख्न र स्वच्छ पिउने पानीको पहुँच तथा बस्ती जलमग्न हुँदा समुदायलाई सुरक्षित आश्रय भवनमा राख्नको लागि गरिएको अध्यक्ष तुलाधरले बताउनुभयो ।
उच्चसतरीय अनुगमन टोलीमा जिल्ला आपातकालिन कार्य सञ्चालन केन्द्र बाँकेका सूचना व्यवस्थापन अधिकृत रुपन ज्ञवाली, जिल्ला प्रशासन कार्यालयका नायब सुब्बा बेदेश्वर गौतम, बाँके युनेस्को क्लबका अध्यक्ष तुलाधर, प्रमुख संरक्षक परवेजअलि सिद्दिकी, प्रशासन तथा वित्त प्रमुख बेदप्रसाद पङ्गाली र प्राविधिक सल्लाहकार साजिदअलि सिद्दिकी लगायतको सहभागिता थियो ।
