नेपालगञ्ज, २९ भदौ । जनसहभागितामूलक विकासको अवधारणावाट अभिप्रेरित भएर गठन गएको बुलबुलिया शान्तिनगर टोल विकास तथा संरक्षण समितिले आज शनिवार टोलको नियमित सरसफाई गरेको छ ।
समितिका सचिव रामकुमार देवकोटाका अनुसार, आज स्थानिय जेष्ठ नागरिक चक्रपाणि देवकोटाको घरदेखि उत्तर—पश्चिम सडक नालीको सरसफाई गरिएको छ । सरसफाईमा स्थानीय जेष्ठ नागरिक, युवावर्ग तथा महिलाहरुको उल्लेख्य सहभागिता रहेको थियो ।
नेपालगञ्ज उपमहानगरपालिका वडा नं. १३ को कार्यालयमा विधिवत दर्ता गरिएको बुलबुलिया शान्तिनगर टोल विकास समितिले आवश्यकताका आधारमा टोलको क्षेत्र छनोट गरि प्रत्येक साताको शनिवार बिहान ६ बजेदेखि ८ बजेसम्म सरसफाई कार्यक्रम सञ्चालन गर्दै आएको छ ।
समितिले यसका अलावा सरसफाई सम्बन्धि सार्वजनिक महत्वको सूचनासहितको होडिङ्ग बोर्ड टोलका दुई स्थानमा राखेको छ भने टोलमा जथाभावी फोहर नगर्न स्थानीयलाई अभिमुखीकरण समेत गर्दै आएको छ । सूचनाको अवज्ञा गरेर सडक, नाली तथा सार्वजनिक स्थानमा कसैले फोहर गरेमा समितिले आवश्यक कारवाहीको चेतावनी पनि दिएको सचिव देवकोटाले बताउनुभयो ।
समितिले टोलको नियमित सरसफाई अभियानका साथै सुरक्षाका दृष्टिकोणले आवश्यक पर्ने स्थानमा सीसी क्यामरा जडानको प्रक्रिया शुरु गरेको छ भने टोलका पाटीपौवा तथा सार्वजनिकस्थलको संरक्षण र सम्बद्र्धन गर्नेलगायतका विषयमा समेत काम गर्दै आएको छ ।
यसैबीच, उक्त टोल विकास समितिको आज अपरान्ह बसेको कार्यसमितिको नियमित मासिक बैठकले तीन बुँदे महत्वपूर्ण निर्णय गरेको छ । समितिका अध्यक्ष नीरज गौतमको अध्यक्षतामा बसेको कार्यसमिति बैठकले आउदै गरेको बडादशै टोलका स्थानीयसंग सौहार्दपूणरुपमा मनाउने निर्णय गरेको छ । समितिले बडादशैका अवसरमा असोज १९ गते शुभकामना आदानप्रदान कार्यक्रम गर्ने र उक्त कार्यक्रममा टोलको सर्वागिण विकासका विषयमा अन्तरक्रियात्मक छलफल हुने निर्णय गरिएको छ ।
त्यस्तै, कार्यसमिति बैठकले दशैका अवसरमा टोलमा आयोजना गरिने दुर्गापूजाका लागि आवश्यक प्रक्रियागत सहयोग गर्ने निर्णय गरेको छ भन्े समितिको सल्लाहकारमा साधारण सदस्य गोर्खबहादुर थापालाई मनोनित गरेको छ ।
