नेपालगञ्ज, २४ भदौ । प्रजातान्त्रिक आन्दोलनका नायक नेपालका पहिलो जननिर्वाचित प्रधानमन्त्री बिशेश्वरप्रसाद कोइराला (बीपी कोइराला) को १११औँ जन्मजयन्ती आज नेपालगञ्जमा विचार गोष्ठी र माल्यार्पण कार्यक्रमको आयोजना गरी मनाइएको छ ।
जन्मजयन्तीका अवसरमा नेपाली कांग्रेस बाँकेले आज नेपालगञ्जस्थित विपी चोकमा रहेको विपी कोइरालाको पूर्णकदको शालिकमा माल्र्यापण कार्यक्रमको आयोजना गरेको थियो । माल्र्यापण कार्यक्रममा नेपाली कांग्रेसका नेता तथा कार्यकर्ता, नागरिक समाजका अगुवा, बुद्धिजीवी, पत्रकारलगायतको उपस्थिति रहेको थियो ।
यसैगरी, बाँके कांग्रेसले नेपालगञ्जस्थित पार्टी कार्यालयमा आयोजना गरेको ‘बीपीको समाजबाद र आजको सन्दर्भ’ विषयक विचार गोष्ठीका वक्ताहरुले विपीको आदर्श र समाजवादको मार्गचित्रमा पार्टीपंक्ति अघि बढदै जानुपर्नेमा जोड दिएका छन् ।
बिचार गोष्ठीमा नेपाली कांग्रेस बाँकेका सभापति नारायणप्रसाद गौडेलले बीपीको विचार नेपालको राजनीतिमा अहिले पनि उत्तिकै सान्दर्भिक रहेको छ भन्नुभयो । गौडेलले भन्नुभयो—‘विपीको बिचारलाई नेपाली कांग्रेसका नेता तथा कार्यकर्ताले ‘राजनीति कोर्ष’ का रुपमा ग्रहण गर्न सक्नुपर्छ ।’
कार्यक्रममा केन्द्रीय सदस्य मैकुलाल बाल्मिकी, जिल्ला उपपसभापति गोपालप्रसाद अधिकारी, कांग्रेस लुम्बिनी प्रदेश सदस्य कृष्णकुमारी सोपकोटा चौधरी, महासमिति सदस्य एवम् महिला संघ केन्द्रीय सदस्य भारती जोशी, महासमिति सदस्य देव बहादुर खत्री, पार्टीका राजनीतिक सल्लाहकार हुर्मत न्यौपाने, क्षेत्रीय सभापतिहरु पोषण केसी, रमेश गुप्तालगायतले बोल्नुभएको थियो ।
