नेपालगञ्ज, ३ भदौ । ‘घरघरमा विरुवा, टोलटोलमा वृक्षारोपण’ नारासहित लुम्बिनी प्रदेश सरकारको बन तथा वातावरण मन्त्रालयले आजवाट प्रदेशका १२ वटै जिल्लामा वृक्षारोपण अभियान शुरु गरेको छ ।
बन तथा वातावरण मन्त्री बादशाह कुर्मीले ‘कल्पवृक्ष’ को विरुवा रोपेर आप्नो गृहजिल्ला बाँकेवाट अभियानको शुभारम्भ गर्नुभएको छ ।
मन्त्री कुर्मीको प्रमुख आतिथ्यमा आज बाँकेको जानकी गाउँपालिका वडा नं. ४ मा रहेको इमला बाबा जंगलीदास आश्रम राम जानकी मन्दिर, खजुरा वडा नं. २ के गाउँस्थित नव भगवती मन्दिर, हरित सिर्जना सामुदायिक वन उपभोक्ता समूहको कार्यालय, जगनिया माता मन्दिर र खजुरा गाउँपालिका वडा नं. ५ मा रहेको माई भगवती मन्दिरमा वृक्षारोपण गरिएको छ ।
अभियान अन्तर्गत ती स्थानहरुमा अमला, निम, शितलचिनी, टंकी, सिसौ, पारिजातको पूmल, कल्पवृक्ष र श्रीखण्डका विरुवा रोपिने छन् ।
प्रदेश बन मन्त्रालयले बाँकेमा वृक्षारोपण गर्न डिभिजन वन कार्यालयलाई जिम्मेवारी दिएको छ । जिल्लाका निमित्त बन डिभिजन प्रमुख विरेन्द्र रोकाले अभियान अन्तर्गत बाँकेका विभिन्न सामुदायिक विद्यालय, धार्मिक स्थल, निजी घरमा वृक्षारोपण गरिने बताउनुभयो ।
वृक्षारोपण कार्यक्रममा मन्त्री कुर्मीले वातावरणीय असरलाई कम गर्दै मानिसलाई स्वस्थ रहन सहयोग पुग्ने विरुवा रोपिने बताउनुभयो । ‘नेपालमा वातावरण प्रदुषण प्रमुख समस्याका रुपमा रहेको छ । यसको समाधानको एउटा प्रमुख कंडी भनेको वृक्षारोपण नै हो’—मन्त्री कुर्मीले भन्नुभयो ।
वृक्षारोपण अभियानलाई बाँकेस्थित पारिवारिक निजी वन संघ र निजी वन सरोकार संघ बाँकेले सघाएको छ ।
