नेपालगञ्ज, २ भदौ । हिजो शनिबार बेलुकी बाँकेको राप्तीसोनारी गाउँपालिका वडा नं. ५ बिनौना चोकमा एक समूहको खुकुरी प्रहारवाट दुई युवा गम्भीर घाइते भएका छन् ।
खुकरी प्रहारवाट बैजनाथ गाउँपालिका वडा नं. ७ परशुरामपुरका २८ वर्षीय सुलभ मल्ल र राप्तीसोनारी गाउँपालिका वडा नं. २ का २८ वर्षीय सन्दिप बिष्ट गम्भीर घाइते भएको जिल्ला प्रहरी कार्यालय, बाँकेका प्रमुख प्रहरी उपरीक्षक तुलबहादुर कार्कीले बताउनुभयो । मल्ल र विष्ट नेपाल तरुण दलका कार्यकर्ता हुन् । भारतको लखनउमा उपचार भइरहेको मल्लको बायाँ कोखा र बिष्टको दुवै हातको कुममा गहिरो चोट लागेको बताइएको छ ।
घटनामा संलग्न रहेको आरोपमा प्रहरीले एमाले निकट युवा संघ बाँकेका अध्यक्ष समेत रहनुभएका राप्तीसोनारी गाउँपालिका वडा नं. २ का वडाअध्यक्ष ज्ञानेन्द्रराज ओलीसहित चार जनालाई नियन्त्रणमा लिएको प्रहरी उपरीक्षक कार्कीले बताउनुभयो ।
यसैबीच, तरुण दल बाँकेले आज आइतवार एक विज्ञप्ती निकालेर घटनाको भत्सर्ना गरेको छ । अध्यक्ष विरेन्द्रबहादुर शाह र सचिव विनोद रिजालद्वारा हस्ताक्षरित विज्ञप्तीमा घटनामा संलग्न ब्यक्तिलाई कडा कारबाहीको माग गरिएको छ ।
