नेपालगञ्ज, १६ असार । अनाधिकृत तवरवाट सदस्यता थप गरिएको विरोधमा नेपाल प्रेस युनियनले भोलि सोमबार नेपाल पत्रकार महासंघको केन्द्रीय कार्यालयदेखि प्रदेश समिति र सबै शाखा कार्यालयहरुमा धर्ना दिने भएको छ ।
युनियनका केन्द्रीय अध्यक्ष शिव लम्सालको अध्यक्षतामा बसेको केन्द्रीय सचिवालय बैठकले महासंघका सबै कार्यालयमा धर्ना दिने निर्णय गरेको हो ।
महासंघको केन्द्रीय कार्यालय, प्रदेश समितिका कार्यालय र शाखाहरुमा भोलि बिहान ११ बजेदेखि १ बजेसम्म एकैपटक धर्ना दिने कार्यक्रम तय गरिएको युनियनका महासचिव दिलीप पौडेलले बताउनुभयो ।
पत्रकार महासंघले आफ्नै संरचना शाखा र प्रदेशले सिफारिस गरेका सदस्यको नाम काटेर, चोर बाटोबाट सदस्य थप गरी मतदाता नामावली सार्वजनिक गरेपछि युनियनले पत्रकार महासंघको केन्द्रीय कार्यालयमा तालाबन्दी गरेर आन्दोलन सुरु गरेको छ ।
