नेपालगञ्ज, २ असार । अत्यधिक गर्मी बढदै गएपछि नेपालगञ्जमा नागरिकको दैनिक कष्टकर बन्दै गएको छ ।
नेपालगञ्जका अत्यधिक गर्मी बढ्नुमा सडक विस्तारका नाममा जथाभावी रुख विरुवा काट्नु प्रमुख कारणका रुपमा हेरिएको छ ।
यस्तै नेपालगञ्जका सार्वजनिकस्थलमा शुद्ध खानेपानी, छहारी, र विश्रामस्थल अभावका कारण सर्वसाधारणलाई गर्मीले अझ बढी पिरोलेको छ ।
सोही अवस्थालाई दृष्टिगत गरी नगरमा स्वच्छ तथा हराभरा वातावरणको व्यवस्थाका बारेमा नेपालगञ्ज उपमहानगरपालिकासंग आज सूचना माग गरिएको छ ।
नेपालगञ्ज वडा नं. ७ निवासी जिज्ञासा तिवारी, कोहीनूर मल्ल, कृष्ण बढही, अरुणकुमार तिवारी, रामकुमार कलवारले सूचना माग गर्नुभएको हो ।
नेपालगञ्जमा बातावरण संरक्षणका लागि के कस्तो योजना छ, उक्त योजना कहिले कार्यान्वयन हुन होे, सडक बनाउदा रुखहरु रोप्ने र रुख काट्नेलाई कस्तो किसिमको कारवाही भएको छ, गर्मी मौसममा विशेष गरि छाडा चौपायाका लागि के कस्तो व्यवस्था गरिएको छ लगायतका विषय उल्लेख गरी उपमहानगरपालिकासंग सूचना माग गरिएको हो ।
नेपालको संविधान २०७२ को धारा २७ र सूचनाको हक सम्वन्धी ऐन २०६४ दफा ३ अनुसार सबैले थाहा पाउनुपर्ने अधिकार अन्तर्गत सूचना माग गरिएको जनाइएको छ ।
