नेपालगञ्ज, १३ जेठ । बाँकेको राप्तीसोनारी गाउँपालिका वडा नं. ८ खल्ला गाउँकी ४० बर्षीया पुतला खत्रीको चट्याङ लागेर मृत्यु भएको छ ।
जिल्ला प्रहरी कार्यालय, बाँकेका अनुसार, आज अपरान्ह चार बजेतिर परेको चट्यांग लागेर सोही स्थानकी खत्रीको घटनास्थलमै मृत्यु भएको हो । मृतक खत्रीको गाउँदेखि करिब एक किलोमिटर उत्तरतर्पmको घण्टेश्वरी बनमा बाख्रा चराउन गएको बेला चट्यांग परेको थियो ।
चट्याङबाट सोही स्थानका ४२ बर्षीया देबा घर्ती, ३६ बर्षीया लिला खत्री र २६ बर्षीया कलसी बुढा घाइते भएको जिल्ला प्रहरी प्रवक्ता प्रहरी नायब उपरीक्षक नारायण डांगीले बताउनुभयो । घाइते महिलाहरुको अस्पतालमा उपचार भइरहेको प्रहरीले जानकारी दिएको छ ।
चट्याङ लागेर तीन वटा बाख्रा पनि मरेको प्रहरीले जनाएको छ ।
बैकिङ्ग कसुर मुद्दाका फरार प्रतिवादी पक्राउ
बाँके प्रहरीले बैंकिङ्ग कसुर मुद्दाका फरार प्रतिवादी अशोककुमार थारुलाई पक्राउ गरेको छ ।
बाँकेको राप्तीसोनारी गाउँपालिका वडा नं. ५ बस्ने ३६ बर्षीया थारुलाई जिल्ला प्रहरी कार्यालय, बाँकेवाट खटिएको प्रहरी टोलीले पक्राउ गरेको हो । पक्राउ गरिएका थारुलाई आजै जिल्ला अदालत बाँकेमा बुझाइएको प्रहरीले जनाएको छ ।
बाँके जिल्ला अदालतको मिति २०७६ चैत ४ गते, २०७८ भदौ २४ गते र २०८० कात्तिक २१ गते बैकिङ्ग कसुर मुद्दामा थारुलाई एक वर्ष १५ दिन कैद र १२ लाख ७५ हजार जरिवाना तोकिएको थियो ।
यसैबीच, बाँके प्रहरीले नेपालगञ्जको वडा न. १ र १८ मा चेकजाँच गर्ने क्रममा भारतबाट अबैध रुपमा भन्सार छली चोरी निकासी पैठारी गरी ल्याएको लेडिज कुर्ता सुरुवाल, पेन्ट, चिसो पेय पदार्थ, काँचो कपडा, मिक्सर लगायतका सामान बरामद गरेको छ ।
अन्दाजी रु.एक लाख ९४ हजार दुई सय मूल्यका उक्त अवैध सामान आजै नेपालगञ्ज भंसार कार्यालयमा बुझाइएको जिल्ला प्रहरी कार्यालयले जनाएको छ ।
