नेपालगन्ज, २१ जेठ । नेपालगन्ज वडा नं. ६ फुल्टेक्रास्थित सिद्धार्थ विद्या सदन अन्तर विद्यालय छात्र टी(ट्वान्टी क्रिकेट प्रतियोगिताको उपाधि जित्न सफल भएको छ । बाँके जिल्ला क्रिकेट संघको आयोजनामा सम्पन्न विद्यालय स्तरीय छनौट प्रतियोगिताको फाइनल खेलमा सिद्धार्थले आदर्श माध्यमिक विद्यालयलाई ८ रनले पराजित गर्दै च्याम्पियन बनेको हो ।
पहिले ब्याटिङ गरेको सिद्धार्थले निर्धारित ओभरमा १५६ रन बनाएको थियो । १५७ रनको लक्ष्य पछ्याएको आदर्श १४८ रनमै अलआउट भएपछि सिद्धार्थले उपाधि आफ्नो नाममा गरेको हो । सिद्धार्थका किरण अधिकारी फाइनल खेलका म्यान अफ द म्याच घोषित भए । उनले उत्कृष्ट बलिङ गर्दै ६ विकेट लिए भने ब्याटिङतर्फ १४ रनको योगदान पनि दिए । सिद्धार्थका आयुष रावतले सर्वाधिक ५६ रन बनाएका थिए । आदर्शका लागि विराज आचार्यले सर्वाधिक ६९ रनको योगदान दिए भने आशिष सलमानीले २ विकेट लिए । प्रतियोगिता जेठ १५ गतेदेखि कोहलपुर क्रिकेट मैदानमा सुरु भएको थियो ।
विद्यालयका प्रिन्सिपल प्रविण गिरीले पढाइसँगै खेलकुद तथा अन्य अतिरिक्त क्रियाकलापमा विद्यालयले विशेष प्राथमिकता दिँदै आएको बताए । उनले यही कारण विद्यालयले निरन्तर सफलता हासिल गरिरहेको उल्लेख गरे । सिद्धार्थ विद्या सदन यसअघि यू–१४ फुटबल प्रतियोगितामा जिल्ला विजेता हुँदै लुम्बिनी प्रदेश च्याम्पियन समेत बनेको थियो ।
