नेपालगञ्ज, २४ साउन । जीवनका लागि पोषण परियोजना अन्तर्गत बाँके युनेस्को क्लबको प्राविधिक सहयोग, हेलन केलर नेपालको आर्थिक सहयोग तथा स्वास्थ्य कार्यालय, बाँकेको आयोजनामा डुडुवा गाउँपालिकाका स्वास्थ्यकर्मीहरूका लागि कुपोषणको एकीकृत व्यवस्थापन सम्बन्धी तीनदिने क्षमता अभिवृद्धि तालिम दुई चरणमा सम्पन्न भएको छ।
तालिममा डुडुवा गाउँपालिकाका वडा नं. १ देखि ६ सम्मका ५९ जना स्वास्थ्यकर्मीहरूको सहभागिता रहेको थियो।
स्वास्थ्यकर्मीहरूको ज्ञान, सीप तथा प्राविधिक क्षमता अभिवृद्धि गर्दै कुपोषणको पहिचान, परीक्षण, उपचार, परामर्श, अभिलेखीकरण तथा प्रतिवेदन प्रणालीलाई प्रभावकारी बनाउनु र समुदाय तथा स्वास्थ्य संस्थास्तरमा गुणस्तरीय पोषण सेवा प्रवाह सुनिश्चित गर्नु तालिमको उद्देश्य रहेको बताइएको छ ।
तालिमको उद्घाटन समारोहको अध्यक्षता स्वास्थ्य कार्यालय, बाँकेका प्रमुख सुनिता पौडेलले गर्नुभएको थियो भने स्वास्थ्य कार्यालय, बाँकेकी पोषण फोकल पर्सन श्रीमती बसन्ती मल्लले तालिमको औपचारिक उद्घाटन गर्नुभएको थियो । कार्यक्रममा प्रमुख अतिथि मल्लले तालिमका उद्देश्य तथा अपेक्षित उपलब्धिबारे प्रकाश पार्दै कुपोषणका समस्याको गहिरो विश्लेषण, तथ्यमा आधारित समाधान र उपयुक्त रणनीतिक कार्यान्वयनमार्फत परिणाम हासिल गर्न सकिनेमा जोड दिनुभयो।
तालिममा व्यवहारिक सिकाइलाई प्राथमिकता दिँदै प्राविधिक प्रस्तुति, समूहगत छलफल, अनुभव आदानप्रदान, व्यावहारिक अभ्यास तथा प्रदर्शनात्मक विधिहरू प्रयोग गरिएको थियो।
तालिममा ६ महिनाभन्दा कम उमेरका बालबालिका तथा ६ देखि ५९ महिनासम्मका बालबालिकामा कुपोषण व्यवस्थापन, उपचार तथा व्यवस्थापन, एन्थ्रोपोमेट्रिक मापन लगायतका महत्वपूर्ण विषयमा सैद्धान्तिक तथा व्यवहारिक ज्ञान दिइएको थियो।
तालिममा हेलन केलरका फिल्ड अफिसर लीलबहादुर नेपाली र बाँके युनेस्कोका कार्यक्रम संयोजक दृष्टि शाहले सहजीकरण गर्नुभएको थियो ।
तालिमबाट डुडुवा गाउँपालिकाका सम्बन्धित वडा तथा समुदायमा कुपोषण अवस्थाको समयमै पहिचान, उपचार, परामर्श तथा फलोअपलाई थप प्रभावकारी बनाउन योगदान पुग्ने अपेक्षा गरिएको छ।
“सक्षम स्वास्थ्यकर्मी, स्वस्थ बालबालिका र पोषणयुक्त समुदाय—हाम्रो साझा प्रतिबद्धता।”
