नेपालगञ्ज, १ बैशाख । नेपाली काँग्रेसका महामन्त्री गगन थापाले पार्टीमा शुद्धिकरण र सुदृढीकरण आवश्यक रहेको बताउनुभएको छ ।
बाँकेको डुडुवा र नेपालगञ्जमा आज भएको जनतासंग सम्वाद कार्यक्रममा महामन्त्री थापालले पार्टीलाई अब नयाँ ढंगले अघि बढाउनुको विकल्प नरहेकोमा जोड दिनुभयो ।
थापाले अहिले देखा परेका थुप्रै बेथितिहरुलाई किनारा लगाउन सशक्त भूमिका खेल्दै पार्टीलाई सुदृढ बनाएर लैजानुपर्ने बेला आएको छ भन्नुभयो ।
बाँकेबासीले उठाएका सवाल राजधानी पुगेर सरकार र पार्टीका शीर्ष नेता समक्ष राख्ने बताउदै महामन्त्री थापाले भन्नुभयो-‘गठबन्धनरुपी फोहोरबाट बाहिर निस्केको कांग्रेसले अब आफूलाई सुदृढ बनाएर लैजानै पर्छ ।’
कार्यक्रममा नेपाली काँग्रेसका केन्द्रीय सदस्यहरु मधु आचार्य, प्रतिमा गौतम, मैकुलाल बाल्मिकी, लुम्बिनी प्रदेश सभापति अमरसिंह पुन, कांग्रेस बाँकेका कार्यबाहक सभापति गोपालप्रसाद अधिकारी लगायतको उपस्थिति रहेको थियो ।
यस्तै महामन्त्री थापाले प्रेस युनियन बाँकेले प्रकाशन गरेको नयाँ वर्ष २०८१ भित्तपात्रोको विमोचन गर्नुका साथै पार्टी कार्यकर्तासंगको भेटघाटमा समेत सहभागि हुनुभएको थियो ।
महामन्त्री थापा भोलि विहान नेपालगञ्जका उद्योगी व्यवसायीसंगको संवादमा सहभागि तथा खजुरामा पार्टी कार्यकर्ता भेटघाट तथा सुशील कोइराला क्यान्सर अस्पतालको अवलोकन गर्नुहुने कार्यक्रम रहेको पार्टी सचिव सुधांशु कोइरालाले जानकारी दिनुभयो ।
