नेपालगञ्ज, २५ चैत । नेपाली बजारमा आज फेरी सुनको मूल्य उकालो लागेको छ । लगातार उकालो लागेको सुनको मूल्यमा आज नयाँ कीर्तिमान कायम भएको छ ।
आज सुनको मूल्य प्रतितोला रु दुई हजार नौ सयले वृद्धि भएको नेपाल सुनचाँदी व्यवसायी महासंघले जनाएको छ ।
महासङ्घका अनुसार आज छापावाला सुन प्रतितोला रु एक लाख ३५ हजार ६०० कायम भएको छ । शुक्रबार छापावाला सुन प्रतितोला रु एक लाख ३२ हजार ७०० मा कारोबार भएको थियो ।
यस्तै, तेजाबी सुनको मूल्य पनि प्रतितोला दुई हजार ९०० ले बढेर रु एक लाख ३४ हजार ९५० निर्धारण भएको छ । शुक्रबार तेजाबी सुन रु एक लाख ३२ हजार ५० निर्धारण भई कारोबार भएको थियो ।
यसैगरी चाँदीको मूल्य पनि उकालो लागेको छ । महासङ्घका अनुसार चाँदीको मूल्य आजका लागि प्रतितोला रु एक हजार ६७० निर्धारण भएको छ । शुक्रबार चाँदीको मूल्य रु एक हजार ६१५ मा कारोबार भएको थियो ।
