नेपालगञ्ज, २२ चैत । नेपालगञ्जवाट प्रकाशित हुने सदभाव दैनिक एवं सेतोखरीमा प्रकाशित समाचारका बिषयमा जिल्ला प्रहरी कार्यालय, बाँकेका प्रमुख एवं प्रहरी उपरीक्षक (एसपी) सुवास बोहराले उक्त पत्रिकाका सम्पादक दामोदर भण्डारीलाई दिएको धम्कीप्रति बाँकेका पत्रकारहरुले चिन्ता र चाँसो व्यक्त गरेका छन् ।
नेपाल पत्रकार महासंघ बाँके शाखाका अध्यक्ष समेत रहनुभएका उक्त पत्रिका÷अनलाइनका सम्पादक भण्डारीलाई समाचार रोक्न दिएको धम्कीपूर्ण दबाबका बिषयमा पत्रकार सम्बद् संगठनहरुका पदाधिकारी तथा विभिन्न सञ्चार माध्यमका पत्रकारहरुको बिहीवार बसेको आकस्मिक बैठकले चिन्ता र चाँसो व्यक्त गरेको हो ।
बैठकमा सहभागि सम्पादक भण्डारीका अनुसार, प्रहरी उपरीक्षक बोहराले तस्करवाट पैसा खाएको समाचार सेतोखरी र सद्भावमा प्रकाशित विषयलाई लिएर उहाँले धम्की दिनुभएको हो ।
जिल्ला प्रहरी प्रमुख बोहराले भण्डारीलाई समाचार रोक्न दिएको अनुचित धम्कीपूर्ण दबाबप्रति गम्भीर चासो र चिन्ता प्रकट गर्दै समग्र जिल्लाको सुरक्षाको जिम्मेवारी निर्वाह गर्ने पदमा रहेको व्यक्तिले प्रदर्शन गरेको व्यवहार सविधानप्रदत प्रेस तथा अभिव्यक्ति स्वतन्त्रता बिरोधी रहेको बैठकले ठहर गरेको छ ।
आकस्मिक बैठकले यो लगायत पछिल्ला दिनमा राज्यका निकायबाट एकपछि अर्को गरी बाँकेमा पत्रकार एवं प्रेस स्वतन्त्रतामाथि नियोजित तरिकाबाट प्रहार गर्ने गरी भइरहेका घटना रोक्न संयुक्तरुपमा प्रतिवादन गर्ने र निष्पक्ष एवं भयरहित तरिकाले पत्रकारिता गर्ने वातावरण निर्माणका लागि थप छलफल गरी धारणा सार्वजनिक गर्ने निष्कर्ष निकालेको छ ।
छलफलमा महासंघ बाँकेका अध्यक्ष दामोदर भण्डारी, महासंघ लुम्बिनी प्रदेश समिति उपाध्यक्ष शुक्रऋषि चौलागाई, पूर्व केन्द्रीय सदस्य झलक गैरे, पूर्व अध्यक्ष निरज गौतम, पूर्व अध्यक्ष रुद्र सुवेदी, प्रेस चौतारी बाँकेका अध्यक्ष दुर्गा रोकाय, प्रेस युनियनका अध्यक्ष प्रियास्मृती ढकाल, प्रेस सेन्टरका अध्यक्ष राजेश आचार्यसहित अग्रज पत्रकार एवं महासंघका पदाधिकारी एवं सदस्यहरु सहभागि हुनुहुन्थ्यो । बैठकले बिहीवारको छलफलका आधारमा थप धारणा सार्वजनिक गर्दै अघि बढ्ने निष्कर्षसमेत निकालेको छ ।
