नेपालगञ्ज, १४ चैत । नेपालगञ्जको कृष्णसार एफएम ९४ मेगाहर्जले आज बुधवार आप्नो १५औं बार्षिकोत्सव मनाएको छ ।
सो अवसरमा एफएमले नेपालगञ्जस्थित निलसागर सेवाआश्रममा रहेका बालबालिका तथा अभिभावकसंग बार्षिकोत्सवको खुशी साटासाट गरेको थियो । आश्रम पुगेको एफएमका कर्मचारीहरुले त्यहा रहेका बालबालिका तथा अभिभावकसंगै वार्षिकोत्सवको केक काटेर फलफुल खाँदै खुशी साटासाट गरेका हुन् ।
त्यस अवसरमा निलसागर आश्रमका संस्थापक अध्यक्ष सरिता खनालले आश्रममा रहेका अनाथ बालबालिका अभिभावकहरुको उद्धार, रहन–सहन, समस्यालगायत अवस्थाको बारेमा जानकारी गराउनु भएको थियो । उहाँले आश्रममा अभिभावकहरुको संख्या थपिदै जाँदा आर्थिक हिसाबले व्यवस्थापन गर्न चुनौति भएको भन्दै यसको व्यवस्थापनमा सरकारले खासै चासो नदिएको गुनासो गर्नुभयो ।
आश्रमका उपाध्यक्ष अमन निलसागरले आर्थिक अवस्थाको अभावले निमार्णाधिन भवन समेत अलपत्र अवस्थामा रहेकाले मानवसेवा कार्यका लागि सरकारको पनि दायित्व रहेको भन्दै सहयोग गर्नुपर्नेमा जोड दिनुभयो ।
सो अबसरमा कृष्णसार एमएमका संस्थापक राकेशकुमार मिश्र, माधव अधिकारी, रामप्रसाद आचार्य, कृष्णराज अधिकारी, बजार व्यवस्थापक पवन जयसवाल, प्राविधिक मान सिंह र वरिष्ठ पत्रकार निरज गौतम लगायतले फलफूल वितरण गर्नुभएको थियो ।
कार्यक्रममा निलसागर सेवाश्रमको तर्फबाट रेडियोलाई मायाको चिनो समेत प्रदान गरिएको थियो ।
बार्षिकोत्सवकै अवसरमा एफएमले आप्नो वार्षिक प्रकाशन उत्साहको कभर सार्वजनिक गरेको छ । निकट भविष्यमा उक्त प्रकाशन सार्वजनिक गर्दै वार्षिकोत्सवको विशेष कार्यक्रम आयोजना गरिने एफएमका कार्यकारी निर्देशक तुला अधिकारीले बताउनुभयो ।
२०६५ साल चैत्र १४ गते वेलुका ६ बजेर ५५ मिनेटबाट कृष्णसार एफएमले प्रसारण सुरु गरेको थियो । ‘कृष्णसार जत्तिकै तेज’ स्लोगानका साथ १५ वर्ष अघि समुदायका लागि सञ्चार अभियान नेपालद्वारा स्थापित कृष्णसार एफएमले नेपालगञ्जको सशक्त सञ्चार गृहको पहिचान बनाएको दावी गर्दै आएको छ ।
एफएमले गत वर्षदेखि अत्याधुनिक डिजिटलमैत्री स्टुडियोबाट उत्पादन तथा प्रसारण गरिरहेको छ । दुई हजार वाट क्षमताको अत्याधुनिक डिजिटल ट्रान्समिटरबाट प्रसारण सेवा दिइरहेको बताइएको छ ।
