नेपालगञ्ज, २६ फागुन । बाँकेका विपन्न मुस्लिम परिवारलाई बाँके युनेस्को क्लबले खाद्यान्न सामग्री उपलव्ध गराएको छ । कतार च्यारिटीको सहयोगमा क्लबले बाँकेको नेपालगञ्ज उपमहानगरपालिका, कोहलपुर नगरपालिका, जानकी, खजुरा र डुडुवा गाउँपालिकाका ३६० घरपरिवारलाई रमजानका लागि खाद्यान्न सामग्री उपलव्ध गराएको हो ।
रमजान महिनामा खानामा पहुँच होस भन्ने उद्देश्यले उपलव्ध गराइएको खाद्यान्नमा प्रतिपरिवार एक बोरा मसिनो चामल, पाँच लिटर सूर्यमुखी तेल, दुई किलो चिनी, तीन किलो चना, एक किलो सेवई र एक पोका आयोनून उपलव्ध गराइएको क्लबका प्रमुख संरक्षक प्रवेजअलि सिद्धिकीले जानकारी दिनुभयो । उहाँका अनुसार, प्रतिपरिवार उपलव्ध गराइएको खाद्यान्न सामग्रीको मूल्य रु चार हजार दुई सय ३८ रहेको छ ।
क्लबको कार्यालय प्रागंणमा आज शनिवार आयोजित समारोहमा प्रमुख अतिथि लुम्बिनी प्रदेश सरकारका पूर्व मन्त्री एवम् बाँके क्षेत्र नं. एक का सांसद कृष्णा केसी नमूना र कतार च्यारिटी दोहाका जनरल सुपरभाइजर मेतेब सईद अलमर्रीले विपन्न परिवारका सदस्यलाई खाद्यान्न सामग्री वितरण गर्नुभएको थियो ।
त्यस अवसरमामा जनरल सुपरभाइजर अलमर्रीले त्यहा उपस्थित विपन्न परिवारका सदस्यसंग उपलव्ध गराइएको खाद्यान्नको गुणस्तर, खाद्यान्न रमजानभरीका लागि पुग्ने, नपुग्ने बारे भलाकुसारी गर्नुभएको थियो । उपस्थित विपन्न परिवारका सदस्यहरुले एकैस्वरमा रमजानका लागि खाद्यान्न पुग्ने र गुणस्तर पनि राम्रो भएको प्रतिक्रिया जनाएका थिए ।
कार्यक्रममा प्रमुख अतिथि पूर्व मन्त्री नमूना, कतार च्यारिटीका जनरल सुपरभाइजर अलमर्री, खजुरा गाउँपालिका अध्यक्ष डम्बर विक तूफान, क्लबका अध्यक्ष रबि तुलाधर, कार्यकारी निर्देशक साजिदअलि सिद्धिकीलगायतका वक्ताहरुले बोल्नुभएको थियो ।
