नेपालगञ्ज, २४ फागुन । बाँकेमा चोरको कुटाइबाट एक जनाको मृत्यु भएको छ भने एक जना गम्भीर घाइते भएका छन् ।
जिल्ला प्रहरी कार्यालयका अनुसार, जानकी गाउँपालिका—५ रुद्रपुर नयाँबस्ती निवासी सन्तोष थारुको घरमा ५÷७ जना चोरहरु छिरेको थाहा पाएपछि प्रतिकार गर्न खोज्दा घरबेटी सन्तोष थारुको चोरको कुटाइवाट मृत्युभएको हो ।
गम्भीर घाइते थारुको उपचारका क्रममा नेपालगञ्ज शिक्षण अस्पतालमा मृत्यु भएको प्रहरीले जनाएको छ । सो घटनामा घाइते मृतक थारुकी धर्मपत्नी सबिता थारुको भेरी अस्पतालमा उपचार भइरहेको ।
उक्त घटनापछि प्रहरी नायब निरीक्षक जयबहादुर थारुको नेतृत्वमा खटिएको प्रहरी टोलीले लुटेराहरूको खोज तलास गरिरहेको छ ।
चोरहरूले मृतक थारुको घरबाट दुई वटा कानको झुम्का, एउटा नाकको फुली, दुई वटा मोबाइल र करिब ४० हजार नगद लुटेर फरार भएको प्रहरीले जनाएको छ ।
जिल्ला प्रहरी कार्यालयबाट ३ किलोमिटरको दुरीमा यस्तो घटना हुनुले प्रहरीको सुरक्षा व्यवस्थामाथि स्थानीयले प्रश्न उठाएका छन् ।
