नेपालगञ्ज, २३ फागुन । बाँके युनेस्को क्लबले बर्दिया जिल्लामा ‘सशक्त बालिका परियोजना’ कार्यक्रम सञ्चालन गरेको छ ।
परियोजना कार्यक्रम अन्तर्गत बर्दियाको स्थानीय निकाय गुलरिया र मधुवन नगरपालिका तथा बढैयाताल गाउँपालिकालाई समेटिएको क्लबका प्रमुख संरक्षक प्रवेजअलि सिद्धिकीले बताउनुभयो ।
उक्त तिनवटै स्थानीय निकायका स्कुले बालबालिका, बाल क्लब, किशोरी क्लब र युवा क्लबमा आबद्ध बालिकालाई सामाजिकरुपमा सशक्त बनाउने विभिन्न पक्षका तालिमहरु परियोजना अन्तर्गत सञ्चालन हुँदै आएको छ ।
यसैक्रममा, उक्त क्षेत्रका बालिकाका लागि ‘जलवायु परिवर्तन, विपद् जोखिम व्यवस्थापन तथा विपद्को समयमा मानवीय सहायता’ तालिम दिइएको छ ।
जोखिममा परेका समुदाय र सम्भावित नोक्सानीलाई कम गर्न अपनाउनुपर्ने सावधानी तथा विभिन्न प्रकारको विपद र प्रकोपबाट सम्पत्ति, समुदाय र स्वय्मलाई सुरक्षित राख्न अपनाउनुपर्ने विधिका विषयमा सहभागिहरुलाई व्यवहारिक ज्ञान दिइएको छ ।
यसका साथै बाढी, आगलागी, आँधी र भूकम्प जस्ता विपद्का प्रकारका साथै जलवायु परिवर्तनका कारण र त्यसको प्रभाव र जोखिम न्यूनीकरणका लागि चाल्नुपर्ने पहल र जोखिम मूल्याङ्कन तथा जोखिम क्यालेन्डर अफ द इयरका बारेमा पनि प्रशिक्षण दिइएको क्लबका प्रमुख संरक्षक सिद्धिकीले जानकारी दिनुभयो ।
पाँच दिनसम्म सञ्चालन भएको उक्त तालिममा ३० जना बालिकाको सहभागिता रहेको थियो ।
नेपाल रेडक्रस सोसाइटी बर्दियाका विपद व्यवस्थापन प्रशिक्षकद्धय महेशचन्द्र गौतम र लौटन थारुले प्रशिक्षण दिनुभएको थियो ।
तालिम समापन समारोहमा गुलरिया नगरपालिकाका उपमेयर सावित्रा गौतमले सहभागिलाई प्रमाणपत्र प्रदान गर्दै मानवीय सहायतामार्फत बालविवाह न्यूनीकरण तथा जोखिममा परेकाहरूको सशक्तीकरणमा क्लबले खेलेको भूमिका प्रशंसनिय छ भन्नुभयो ।
क्लबका अध्यक्ष रबि तुलाधरको सभापतित्वमा भएको तालिम समापन समारोहमा क्लबका प्रमुख संरक्षक सिद्दिकी, वरिष्ठ उपाध्यक्ष पञ्चम गुरुङ, कार्यकारी निर्देशक साजिद अली सिद्दिकी र नेपाल पत्रकार महासंघ बर्दियाका संस्थापक अध्यक्ष कमल पन्थीलगायतले बोल्नुभएको थियो ।
तालिम समापन समारोहमा परियोजना संयोजक गोविन्द लामिछाने, कार्यक्रम अधिकृत ईश्वर विक र अन्य परियोजनाका कर्मचारीहरुको पनि सहभागिता थियो ।
