नेपालगञ्ज, २२ फागुन । लुम्बिनी प्रदेशका कृषिमन्त्री भण्डारीलाल यादवले प्रदेश सरकार किसानको उत्पादन बढाउन योजनाबद्ध ढंगवाट सहयोग गर्न तत्पर रहेको बताउनुभएको छ ।
कतार च्यारिटी नेपालसंगको साझेदारीमा बाँके युनेस्को क्लबले खजुरा गाउँपालिकामा सञ्चालन गरेको साना सिँचाइ आयोजनाहरुको स्थलगत अनुगमन गर्दै मन्त्री यादवले प्रदेश अन्तर्गत जिल्लाका कृषक समूहलाई पशुपन्छी तथा अन्य कृषि उपकरण सहयोग गर्न समेत प्रदेश सरकार क्रियाशिल रहदै आएको छ भन्नुभयो ।
अनुगमनअघि मन्त्री यादवले आयोजनाका लाभार्थी किसानसँग भेटघाट गरेर तरकारी खेतीमा उनीहरूको संलग्नता र आवश्यक थप कृषि सहयोगका बारेमा छलफल गर्नुभएको थियो ।
उक्त अनुगमन टोलीका सदस्य खजुरा गाउँपालिका अध्यक्ष डम्बरबहादुर विकले आयोजनाको सहयोगपछि किसानको सफलता देखेर आफु धेरै प्रभावित भएको बताउदै बाँके युनेस्को क्लबसंगको सहकार्यमा गरिब किसान समूहलाई सहयोग गर्न गाउँपालिका प्रतिबद्ध छ भन्नुभयो ।
अनुगमन टोलीमा बाँके युनेस्को क्लबका प्रमुख संरक्षक प्रवेज अली सिद्दिकी, अध्यक्ष रबीकुमार तुलाधर, बरिष्ठ उपाध्यक्ष पञ्चम गुरुङ, कार्यकारी निर्देशक साजिदअलि सिद्दिकी, कार्यक्रम संयोजक बिनिता आरसी र बागेश्वरी बहुउद्देश्यीय सहकारी संस्थाका अध्यक्ष कमला न्यौपाने लगायतको सहभागिता थियो ।
