नेपालगञ्ज, १७ फागुन । दादुरा-रुबेलाबिरुद्धको राष्ट्रिय खोप अभियान अन्तर्गत बाँके जिल्लाका ८ स्थानीय तहका ८१ वडाका तोकिएको खोपकेन्द्रमा आजसम्म एक लाख ५६ हजार ६१० जनाले खोप लगाएका छन् ।
यो संख्या लक्ष्यको ९४.६ प्रतिशत प्रगति भएको स्वास्थ्य कार्यालयका निमित्त प्रमुख नरेशबाबु श्रेष्ठले जानकारी दिनुभयो ।
उहाँका अनुसार, अब लक्ष्यको ५.४ प्रतिशत बालबालिकालाई मात्र खोप लगाउन बाँकी छ । ‘यदि, खोप लगाउने बालबालिकाको संख्या बढ्यो भने पनि सबैलाई खोप लगाइनेछ’-निमित्त प्रमुख श्रेष्ठले भन्नुभयो । दादुरा-रुबेलाको खोप ९ महिलादेखि १५ वर्षका बालबालिकालाई लगाइदैछ ।
खोप लगाउने उमेरका २५० बढी विद्यार्थी भएका जिल्लाका सबै मावितहका विद्यालयमा खोप केन्द्र राखिएको नेपालगञ्ज उपमहानगरपालिका स्वास्थ्य शाखा प्रमुख रामबहादुर चन्दले बताउनुभयो । उहाँका अनुसार, २५० भन्दा कम संख्याका विद्यालयलाई कम्बाइन गरेर खोप लगाउने व्यवस्था मिलाइएको छ ।
खोप अभियान फागुन २५ गतेसम्म सञ्चालन हुनेछ । २५ गतेसम्म पनि खोप लगाउन छुटेकालाई फागनु ३० गतेसम्म घरदैलोमै पुगेर खोप लगाइने चन्दलेबताउनुभयो ।
खोप लगाउन बाँकेमा १ हजार २९६ जना स्वास्थ्यकर्मी र १ हजार २७३ जना महिला स्वास्थ्य स्वयंसेविका परिचालन गरिएको छ ।
