नेपालगञ्ज, १७ फागुन । नेपालगञ्जको खजुरारोडमा पाँचतारे होटल ‘पौवा’ निर्माण हुने भएको छ । विश्वबजारमा नेपाली हस्पिटालिटीको ब्राण्डिङ गर्ने लक्ष्य सहित ७ वर्ष अघि स्थापना भएको होटल पौवाले नेपालगञ्जमा आफ्नो १३ औं शाखा सञ्चालन अन्तर्गत होटल निर्माण गर्न लागेको हो । कोशी र मधेश प्रदेश बाहेक सबै प्रदेशमा उपस्थिति जनाइसकेको होटलले पर्यटनको पश्चिम ढोकाकारुपमा रहेको नेपालगञ्जमा आप्नो शाखा विस्तार गरेको हो ।
नेपालगञ्ज खजुरारोडस्थित करिब दुई विगाहा क्षेत्रफलमा बिहिवार आजवाट निर्माण शुभारम्भ गरिएको १०० कोठे उक्त होटलको प्रबन्ध निर्देशक विष्णु ज्ञवालीले एक समारोहबीच शिलान्यास गर्नुभयो । करिब रु एक अर्ब लागत रहेका होटलको निर्माण कार्य दुई वर्षमा सक्ने लक्ष्य निर्धारण गरिएको छ । ‘जहाँबाट आतिथ्यताको सुरुवात हुन्छ’ भन्ने मूल आदर्शलाई अंगिकार गर्दै पर्यटन बजारमा प्रवेश गरेको होटल पौवाले फरक फरक स्वाद र परिकारका पाँच वटा रेष्टुरेन्ट, चार वटा ठूलो सभाहल सहित १४ मिटिङ हल, सात वटा स्वीट रुम सहित ८० डिलक्स रुमा रहने जनाइएको छ ।
शिलान्यास समारोहमा होटल पौवा प्रालिका अध्यक्ष दुर्गाप्रसाद भण्डारीले नेपाली हस्पिटालिटी सहितको सेवा दिने गरी स्थापना भएको होटल पौवा नेपाली होटल तथा रेष्टुरेण्ट क्षेत्रमा नौलो प्रयोग हुने दाबी गर्नुभयो । ‘होटलमा प्रवे्श गरेदेखि बाहिरिँदासम्म नेपाली स्वाद, नेपाली संस्कृति र नेपालीपन् महसुस् हुनेगरि होटलले सेवा दिनेछ’—अध्यक्ष भण्डारीले भन्नुभयो ।
त्यस्तै संचालक समितिका सदस्य ध्रुवराज न्यौपानेले पौवाको सेवा लिने हरेक ग्राहकले नेपालीपनको महसुस् गर्ने र विश्व पर्यटन बजारमा नेपाली आतिथ्यताको ब्राण्डिङ हुने विश्वास दिलाउनुभयो । उहाँले पौवा नेपाली हस्पिटालिटी भएको नेपालको एक मात्र समूह बताउनुभयो ।
पौवाले लुम्बिनी प्रदेशको भैरहवाको चिल्ड्रेन पार्क र बुटवलको योगीकुटी, दाङको भालुवाङ, लमही र घोराही, कपिलवस्तुको गोरुसिङ्गेमा नेपालीपन सहितको सेवा दिइरहेको छ । त्यसैगरी, पाल्पाको तानसेन र गुल्मीको रेसुङ्गामा अन्तर्राष्ट्रियस्तरको रिसोर्ट सहित होटल सञ्चालन गर्दै आएको छ ।
