डुडुवा न्यायिक समितिको अदालत टोलीद्धारा निरीक्षण

नेपालगञ्ज, १ फागुन । बाँकेको डुडुवा गाउँपालिका न्यायिक समितिको कामकारवाही तथा प्रक्रिया बारे जिल्ला अदालतको टोलीले मंगलवार निरीक्षण गरेको छ । न्यायिक समितिको सेवालाई थप गुणस्तरीय र प्रभावकारी बनाउन निरीक्षण गरिएको बताइएको छ ।
जिल्ला न्यायाधीश सहितको टोलीले निरीक्षणका क्रममा सम्बद्ध पक्षसंग छलफलसमेत गरेको थियो । टोलीले गाउँपालिका अन्तर्गत रहेको न्यायिक समितिले प्रदान गर्ने सेवा, मुद्दा तथा विवाद दर्ता, मिसिलको व्यवस्थापन, राय तथा निर्णय, फैसला र अभिलेखीकरणलगायत विभिन्न प्रक्रियाका जानकारी लिएको पालिका उपाध्यक्ष तथा न्यायिक समितिका संयोजक शाहिदा बताउनुभयो ।
निरीक्षण पश्चात जिल्ला न्यायाधीश केशवराज चपाईले डुडुवा गाउँपालिकाको न्यायिक समितिको न्याय सम्पादन, अदालतको कार्यशैली, ढाँचा, निर्णय प्रक्रिया र व्यहोरा व्यवस्थित रहेको बताउनुभयो ।
उहाँले भन्नुभयो–‘तर न्यायिक समितिमा दक्ष जनशक्तिको अभावले सेवा प्रवाह तथा कार्यसम्पादनमा केहि समस्या भएकाले बेला बेलामा कानूनसम्वन्धी तालिमलगायत अभिमुखीकरण हुनुपर्छ ।’ न्यायाधीश चपाईले समितिका पदाधिकारी र कर्मचारीको क्षमता अभिबृद्धि गर्नुपर्नेमा समेत जोड दिनुभयो ।
गाउँपालिका उपाध्यक्ष तथा न्यायिक समितिका संयोजक बानोले गाउँपालिकाका विभिन्न पक्ष र कार्र्ययोजनाका बारेमा जानकारी गराउदै न्यायिक समितिलाई कानून र अधिकार दिएपनि पालिकास्तरमा दक्ष जनशक्तिको अभावमा कार्यसम्पादनमा कठिनाई भएको बताउनुभयो ।
निरीक्षण टोलीमा अदालतका शाखा अधिकृतद्धय गोविन्द आचार्य र नितु साहु, नासु गणेशकुमार मिश्रको सहभागिता थियो । टोलीले समितिमा रहेका विभिन्न अभिलेखीकरण गरिएका फाइल, मिसिल, रजिस्टर समेतको अध्ययन गरेको थियो । अध्ययनका क्रममा जिल्लाका अन्य स्थानीय तहभन्दा डुडुवाको अभिलेखीकरण व्यवस्थापन उत्कृष्ट, चुस्त र प्रक्रियागत रहेको ठहर गरेको छ । निरीक्षणपछि अदालतले प्रतिबेदन समेत प्रदान गर्ने जनाएको छ ।
डुडुवाको न्यायिक समितिमा चालु आर्थिक वर्ष २०८०÷०८१ को साउनदेखि पुस मसान्तसम्म ४६ वटा मुद्दा दर्ता भएकोमा १६ वटा मुद्दा फच्र्यौट भएको र बाँकी प्रक्रियामा रहेको न्यायिक समितिका कर्मचारी विवेक तिवारीले बताउनुभयो ।