नेपालगञ्ज, २७ माघ । नेपालगञ्जमा १५ औं जिल्लास्तरीय राष्ट्रपति रनिङ शिल्ड खेलकुद प्रतियोगिता २०८० आजदेखि शुरु भएको छ । बाँके जिल्ला खेलकुद विकास समितिको आयोजनामा नेपालगञ्ज रंगशालामा सुरु भएको प्रतियोगिताको लुम्बिनी प्रदेश सांसद माया पुनले उद्घाटन गर्नुभयो ।
प्रतियोगितामा बाँके जिल्लाका ७ स्थानीय तहबाट छनोट भएर आएका खेलाडीले सहभागिता जनाएको जिल्ला खेलकुद विकास समिति बाँकेका अध्यक्ष संदिपजङ्ग शाहले जानकारी दिनुभयो ।
जिल्लास्तरीय प्रतियोगितावाट छनौट भएका खेलाडीले आगामी फागुन ११ देखि १३ गतेसम्म बुटवलमा हुने प्रदेशस्तरीय प्रतियोगितामा सहभागिता जनाउने छन् ।
प्रदेशस्तरीय प्रतियोगितामा बाँकेले ह्याट्रिक गर्ने रणनीति अन्तर्गत तयारी गरेको अध्यक्ष शाहले बताउनुभयो । यसअघि प्रदेशस्तरीय रनिङ्ग शिल्ड बाँकेले दुई पटक जितिसकेको छ । अध्यक्ष शाहकै सभापतित्वमा भएको प्रतियोगिता उद्घाटन समारोहमा ओलम्पियन तथा लुम्बिनी प्रदेशका पुर्वमन्त्री सुरेन्द्रबहादुर हमाल, नेपाली काँग्रेस बाँकेका उपसभापति गोपालप्रसाद अधिकारी, राप्तीसोनारी गाउँपालिका अध्यक्ष तप्तबहादुर पौडेल, लुम्बिनी प्रदेश खेलकुद परिषदका सदस्य नरेन्द्र थापा लगायतको उपस्थिति रहेको थियो ।
खेलकुद विकास समिति बाँकेका उपाध्यक्ष चेतकान्त भट्टराईले स्वागत गर्नुभएको उक्त कार्यक्रमको सञ्चालन तोजिन्द्र बिकले गर्नुभएको थियो ।
प्रतियोगिता सञ्चालन गर्नका लागि कोहलपुर नगरपालिकाले ५ लाख रुपैयाँ सहयोग गरेको समितिका अध्यक्ष शाहले बताउनुभयो । यस्तै जिल्ला खेलकुद विकास समितिलाई लुम्बिनी प्रदेशका सांसद माया पुनले १० लाख रुपैयाँ बराबरको सामाग्री खरिदका लागि आवश्यक सहयोग गर्नुभएको छ ।
प्रतियोगिता यही माघ २९ सम्म सञ्चालन हुने जनाइएको छ ।
