नेपालगञ्ज, १५ माघ । मधेशी आयोगका अध्यक्ष डा. विजयकुमार दत्तले तराई–मधेशसंग जोडिएका नेपाल–भारत सीमामा देखा परेका विभिन्न समस्या समाधानमा सशस्त्र प्रहरीको भूमिका थप सशक्त हुनुपर्नेमा जोड दिनुभएको छ ।
आयोगको कार्यकक्षमा आजसशस्त्र प्रहरी बलका महानिरीक्षक राजु अर्याललाई निर्देशन दिदै अध्यक्ष दत्तले मूलतः सीमाक्षेत्रमा हुने लागूऔषध ओसारपसार, मानव तस्करी, चेलीबेटी बेचविखनलगायतका अपराधिक गतिविधि न्यूनीकरण गर्न सशस्त्र प्रहरी थप जिम्मेवार हुनुपर्छ भन्नुभयो ।
‘यसखाले विभिन्न उजुरीहरु आयोगलाई प्राप्त भएकाले त्यस्ता समस्याको समाधानमा सशस्त्र प्रहरी उच्च मनोबलका साथ जिम्मेवार बन्नुपर्छ’—अध्यक्ष डा. दत्तको भनाई छ ।
डा.दत्तले भारतबाट दैनिक गुजाराका सामान ल्याउँदा सशस्त्र प्रहरीले नागरिकलाई अनाहकमा दुःख दिएको उजुरी आयोगमा आइरहेकाले अब उप्रान्त यस्तो हुन नदिन महानिरीक्षक अर्याललाई सतर्क समेत गराउनुभयो ।
त्यस अवसरमा महानिरीक्षक अर्यालले आयोगसंग सहकार्य सीमा जोडिएका गाउँगाउँमा युवा सशक्तीकरणको लागि सीपमूलक तथा सचेतनामुलक कक्षाहरु संचालन गरिने प्रतिबद्धता जनाउनुभयो ।
