नेपालगन्ज, १३ माघ । मेयर कप अन्तर विद्यालय छात्रछात्रा फुटबल प्रतियोगितामा कोहलपुरको बागेश्वरी एकेडेमीले विजयी सुरुआत गरेको छ ।
नेपालगञ्ज वडा नं. १ स्थित एन्फा ग्रासरुट टे«निङ सेन्टरको मैदानमा आजवाट सुरु भएको प्रतियोगिताको उद्धाटन खेलमा बागेश्वरीले डिफेन्डिङ्ग च्याम्पियन पशुपति माविलाई २—० गोलले पराजित गरेको छ । बागेश्वरीका लागि दुबै गोल सुदिप थापाले गरेका थिए । म्यान अफ द म्याच सुदिपले खेलको १८औं मिनेट र ७२आंै मिनेटमा गोल गरेका हुन् । नेपालगञ्जका वडा नं. १ अध्यक्ष प्रमोद रिजालले सुदिपलाई म्यान अफ दी म्याचको पुरस्कार प्रदान गर्नुभयो ।
बाँके जिल्ला फुटबल संघ आयोजक रहेको प्रतियोगिताको नेपालगञ्जका कार्यवाहक मेयर कमरुद्धिन राईले उद्घाटन गर्नु भएको थियो । उद्धाटन समारोहको अध्यक्षता संघका अध्यक्ष एवम् अखिल नेपाल फुटबल संघका केन्द्रीय सदस्य भोजराज शाहीले गर्नुभएको थियो ।
माघ २४ गतेसम्म संचालन हुने प्रतियोगितामा बाँकेका ८ स्थानीय तहका विद्यालयको सहभागिता रहेको छ ।
प्रतियोगिताका विजेता छात्रछात्राको टिमले समानरुपमा नगद २१ हजार र उपविजेताले ११ हजार प्राप्त गर्नेछन् । प्रतियोगितामा सर्वोत्कृष्ट खेलाडीलाई समेत पुरस्कारको व्यवस्था गरिएको छ ।
