नेपालगञ्ज, ७ माघ । बाँकेको खजुरामा आजदेखि पालिकास्तरीय छैठौं अन्तरविद्यालय मेयर रनिङ शिल्ड खेलकुद प्रतियोगिता सुरु भएको छ ।
खजुरा गाउँपालिका र खेलकुद विकास समिति बाँकेको आयोजना तथा जनता नमूना माध्यमिक विद्यालयको व्यवस्थापकिय जिम्मेवारी रहेको उक्त प्रतियोगितामा माध्यमिक तह, प्राथमिक तह र आधारभूत तह गरी ३ तहमा ४६ खेल विद्यामा प्रतिस्पर्धा हुने जनाइएको छ ।
प्रतियोगिताको माध्यमिक र प्राथमिक तहको विजेताले ३३ हजार, दोस्रो हुनेले २० हजार र तेस्रो हुनेले १४ हजार नगद पुरस्कार पाउनेछन् । त्यस्तै भलिबल, कबड्डी र एथलेटिक्सतर्फ उत्कृष्ट छात्राछात्राले जनही ५ हजार १ सय नगद पुरस्कार पाउनेछन् ।
खजुरा गाउँपालिकाको गिजरा सामुदायिक वनमा पाइने निल गाईको प्रतिक चिन्ह प्रतियोगिताको लोगोमा मस्कटको रुपमा राखिएको छ ।प्रतियोगिताको संघीय सांसद एवम् नेपाली कांग्रेसका सहमहामन्त्री किशोरसिंह राठौरले उद्घाटन गर्नुभएको थियो ।
खजुरा गाउँपालिका अध्यक्ष डम्बरबहादुर विक तूफानको अध्यक्षतामा भएको प्रतियोगिता उद्घाटन समारोहमा लुम्बिनी प्रदेश सभासद एवम् संविधान सभा सदस्य बादशाह कुर्मी र प्रदेश सभासद रत्न खत्री सहभागि हुनुहुन्थ्यो । खजुराको शुक्र भलिबल रंगशालामा संचालित उक्त प्रतियोगिता माघ १० गतेसम्म चल्नेछ ।
