नेपालगञ्ज, ८ माघ । नेपालगञ्जसहित बाँकेमा आज भगवान रामको धार्मिक उत्सव मनाइएको छ । भारतको अयोध्यामा निर्माण गरिएको राम मन्दिरमा प्राण प्रतिष्ठाको अवसरमा उक्त धार्मिक उत्सव मनाइएको हो ।
नेपालगञ्जका चोकचोकमा भगवानको रामको महिमा उल्लेखित व्यानर, प्लेकार्डसहितको झाकी प्रदर्शन गरिएको थियो । त्यसैगरी, रामभक्तहरुको ठूलो संख्यामा सहभागि नेपालगञ्ज र विभिन्न पालिकावाट निकालिएको जुलुसले भगवान रामको जयजयकार गरेको थियो भने चोकचोकमा भण्डारा प्रसादको व्यवस्था गरिएको थियो ।
नेपालगञ्जस्थित रामलिला मैदानमा आयोजना गरिएको उत्सव सभामा हिन्दु धर्मगुरु, लव्ध प्रतिष्ठित व्यक्ति र आमनागरिकको उल्लेख्य सहभागिता रहेको थियो भने रामलिला मैदानलाई भव्यरुपमा सजाइएको थियो ।
यस्तै उत्सवका अवसरमा अवाञ्छित गतिविधि हुनसक्ने सम्भावनालाई दृष्टिगत गरी स्थानीय प्रशासनले सुरक्षा व्यवस्था अत्यन्तै कडा बनाएको थियो । जिल्ला प्रशासन कार्यालयले नेपालगञ्जसहित बाँकेकै विभिन्न महत्वपूर्ण स्थानमा ठूलो संख्यामा प्रहरी परिचालन गरेको थियो । विभिन्न स्थानवाट निकालिएको जुलुसका कारण ट्राफिक प्रहरीलाई भने सवारी साधन व्यवस्थित बनाउन हम्मेहम्मे परेको थियो ।
