नेपालगञ्ज, ५ पुस । बाँकेको डुडुवा गाउँपालिकाले मातहतका कार्यालयहरुको प्रत्यक्ष निगरानी शुरु गरेको छ । गाउँपालिकाले आफ्ना ६ वटै वडा कार्यालय, ६ वटा स्वास्थ्यचौकी, र ७ वटा माध्यमिक विद्यालयलाई सिसी क्यामरामार्फत निगरानी गरिएको पालिका अध्यक्ष नरेन्द्रकुमार चौधरीले बताउनुभयो ।
‘सिसिटिभी सेन्ट्रलाइजेशन सिष्टम’ मार्फत कार्यालयले प्रवाह गर्ने सेवाको गुणस्तरीयता, गतिविधिको अवस्थाबारे जानकारी र सुरक्षा अवस्थाको निगरानी गरिनेछ’—अध्यक्ष चौधरीले भन्नुभयो ।
पालिकाको प्रशासनिक कार्यालय भवनमा इन्टरनेटसहितको प्रविधि जडान गरि सबै कार्यालयहरुमा सिसिटिभी क्यामरा जडान गरेर पालिका अध्यक्षको कोठाबाट प्रत्यक्ष निगरानीको व्यवस्था गरिएको छ । यो प्रर्णालीले सबै कार्यालयमा इन्टरकमफोन, इन्टरनेट र सिसि क्यामरामार्फत फुटेजसमेत हेर्न सकिने पालिकाका सूचना प्रविधि अधिकृत सुरेश वर्माले बताउनुभयो ।
उहाँका अनुसार पालिकामा आइटीको सर्भरसहितको मेसिन जडान गरिएकाले सबै स्थानको निगरानी गर्न सहज भएको छ भने वडा कार्यालय, शिक्षा र स्वास्थ्य क्षेत्रमा प्रभावकारी सेवा प्रवाह गर्न मद्दत पुग्ने विश्वास लिइएको छ ।
पालिकाको सबै कार्यालय तथा इकाईमा विस्तारै यो प्रणाली विस्तार गर्ने योजना रहेको जानकारी गराइएको छ । पालिकाको ५ नंं र ६ नंं वडा कार्यालय बाहेक सबैमा यो प्रणाली लागु गरिएको वर्माले बताउनुभयो ।
