नेपालगञ्ज, ३ पुस । नेपालगञ्जस्थित निलसागर सेवा आश्रममा भएको व्यक्ति मृत्यु प्रकरणको घटना अहिले सतहमा आएको छ । आश्रममा राखिएका सुनिलसिंह सिजापतिको मृत्यु प्रकरण सतहमा आएको हो ।
मंसिर २९ गते शनिवार आश्रम पु¥याइएका नेपालगञ्ज गणेशपुरका ४० बर्षीय सिजापतिको भोलिपल्ट आश्रम परिसरमा रहेको पानीको सानो खाल्डोमा डुबेर मृत्यु भएको थियो ।
आश्रमकी अध्यक्ष सरिता खनालले मानसिक तथा शारिरीकरुपमा कमजोर सिजापतिलाई परिवारजनको आग्रहमा आश्रममा राखिएको बताउनुभयो । ‘यो घटना दुःखदायी हो । हामीले राख्दैनौ भन्दाभन्दै पनि परिवारजनको आग्रहमा राखेका हौ’, अध्यक्ष खनालले भन्नुभयो ।
अर्कोतर्प, जिल्ला प्रहरी कार्यालयका प्रवक्ता प्रहरी नायब उपरीक्षक नारायण डांगीले प्रारम्भिक छानवीनवाट घटना भवितव्य जस्तै देखिएको बताउनुभएको छ । ‘हामी अनुसन्धान प्रक्रियामै छौ’, डांगीले भन्नुभयो—‘सबैखाले कानुनी प्रक्रिया पूरा भएपछि घटना बारे थप बताउन मिल्छ ।’
नीलसागर सेवा आश्रममा विभिन्न स्थानवाट उद्दार गरिएका बेसहारा, असहाय जेष्ठ नागरिक र बालबालिकालाई राख्ने गरिएको छ ।
