नेपालगञ्ज, २ पुस । बाँकेको मैटहवा नजिकै टिपरले भ्यानलाई ठक्कर दिँदा १३ जना घाइते भएका छन् । आज बिहान बाँकेको कोहलपुरबाट बर्दियाको बाँसगढीतर्फ जाँदै गरेको भे १ ज ७४७ नम्बरको भ्यानलाई टिपरले ठक्कर दिएको जिल्ला प्रहरी कार्यालय, बाँकेले जनाएको छ ।
टिपरको ठक्करवाट बर्दियाका अन्जु चौधरी, सुनिता नेपाली, रमेश थारू, विष्णुकला खत्री, कमलाकुमारी देवकोटा, प्रशान्त विष्ट, सुर्खेतका प्रेम चदारा, बाँके बैजनाथ गाउँपालिकाका अप्सरा बुढाथोकी, सपना परियार, करण डडेल, पठे एरी, कोहलपुरका टीकाकुमारी डीसी र भ्यानका चालक कोहलपुरकै प्रदीप विक घाइते भएका छन् ।
घाइतेमध्ये ७ जना सामान्य उपचारपछि घर फर्केका छन् । बाँकी ६ जनाको उपचार कोहलपुर शिक्षण अस्पतालमा भइरहेको प्रहरीले जनाएको छ ।
भ्यानलाई ठक्कर दिने चालक र टिपरलाई नियन्त्रणमा लिएर प्रहरीले अनुसन्धान प्रक्रिया अघि बढाएको छ ।
