नेपालगञ्ज, २८ मंसिर । नेपालगञ्जमा भएको ‘आमा सेमिनार’ मा प्रस्तुत भएका विषयवस्तुले धेरैका आँखा रसाए । कतिपय सहभागि त भक्कानियर रोए । सम्मेलनमा आमाको माया, ममता, त्याग, पीडा, वेदना र सन्तानप्रतिको भावनालाई प्रस्तुत गरिएको थियो ।
मानवसेवा आश्रमले आयोजना गरेको सेमिनारमा आश्रमका संस्थापक अध्यक्ष रामजी अधिकारीले आमाको महिमा, पीडा र त्यागबारे प्रस्तुती दिनुभएको थियो । सन्तानका लागि आजीवन मरिमेट्ने आप्ना अभिभावकलाई अपहेलित र घरबाट समेत निकाला गर्ने प्रवृत्ति अहिले बढदै गएको छ । यही अवस्थालाई बोध गर्दै आश्रमले आमा र मूलतः अभिभावकप्रति सन्तानलाई जिम्मेवार र असल बनाउन देशव्यापीरुपमा आमा सम्मेलन गर्दै आएको छ ।
अध्यक्ष अधिकारीका अनुसार, आश्रमले २०८२ सालभित्र सहयोगापेक्षी सडकआश्रित मानवमुक्त राष्ट्र नेपाल निर्माणको लक्ष्य लिएको छ । आश्रमले सडकपेटी र सार्वजनिक स्थलहरुमा कष्टपूर्ण जीवन विताउन विवश अनाथ, अपाङ्ग, अशक्त, असहाय, शारिरीक तथा मानसिकरुपमा अति कमजोर मानवहरुको उद्धार, उपचार, पालनपोषण एवं पारिवारीक पुनर्मिलनको गर्दै आएको छ ।
मुठीदानबाट संचालित आश्रमको नेपालगञ्ज शाखामा अहिले ५० जनाले आश्रय लिइरहेका छन् । त्यसमध्ये ३५ जना पुरुष १२ जना महिला र ३ जना बालबालिका रहेको बाँके जिल्ला संयोजक उर्विन सापकोटाले जानकारी दिनुभयो ।
