नेपालगञ्ज, १ मंसिर । खुकुरी प्रहरी गरी फरार एक अभियुक्तलाई बाँके प्रहरीले पक्राउ गरेको छ । प्रहरीले आकाशजङ्ग रानालाई बाँकेको खजुरावाट पक्राउ गरेको हो ।
प्रहरीले घेरा हाली पक्राउ गर्ने क्रममा भाग्न खोजेपछि रानाको खुट्टामा गोली हानिएको थियो । अभियुक्त रानाको अहिले भेरी अस्पतालमा उपचार भइरहेको बाँके प्रहरी प्रवक्ता प्रहरी नायब उपरीक्षक नारायण डाँगीले जानकारी दिनुभयो ।
प्रहरी नायब उपरीक्षक डांगीका अनुसार, अभियुक्त रानाले हिजो बाँकेको कोलपुरमा मिनबहादुर विकलाई खुकुरी प्रहार गरेका थिए । घाइते विकको टाउकोमा गम्भीर चोट लागेको छ । उनको भारतको लखनउमा उपचार भइरहेको जनाइएको छ ।
अभियुक्त रानाले २०८० साल कात्तिक २८ गते एक नाबालिकलाई जबरजस्ती करणी गरेको उजुरी परेको छ भने उनी २०७९ भदौ २७ गते लागुऔषध मुद्दामा सजाय भुक्तान गरेका व्यक्ति भएको प्रहरी उपरीक्षक डांगीले बताउनुभयो ।
